Першыя білеты на ЧС па хакеі ў Мінску паступяць у продаж у сакавіку 2013 года

23.08.2012 / 11:15

Першыя білеты на чэмпіянат свету па хакеі 2014 года ў Мінску паступяць у продаж у сакавіку-красавіку 2013 года. Аб гэтым паведаміў старшыня Мінгарвыканкама Мікалай Ладуцька 22 жніўня на пасяджэнні аргкамітэта па падрыхтоўцы да мерапрыемства. У ім узяў удзел прэм’ер-міністр Беларусі Міхаіл Мясніковіч.

«Важна, каб у Мінгарвыканкама, Мінспорта была зваротная сувязь з людзьмі. Трэба вывучыць меркаванні таксістаў, уладальнікаў рэстаранаў і іншых зацікаўленых, як найлепш усё арганізаваць, каб забяспечыць максімальна камфортныя ўмовы для жыхароў і гасцей сталіцы», — цытуе Мясніковіча прэс-служба ўрада. Прэм’ер-міністр даручыў шырока задзейнічаць для гэтага сродкі масавай інфармацыі.

«Для нас гэта маштабнае іміджавае мерапрыемства ў вачах сусветнай спартыўнай супольнасці», — падкрэсліў Ладуцька. Ён назваў тэмпы падрыхтоўчых работ да чэмпіянату здавальняючымі. Ужо падрыхтаваныя інфармацыйныя матэрыялы і блок даведнікаў, якія дазволяць гасцям Мінска больш даведацца пра Беларусь і яе сталіцу. У цэнтральнай частцы горада з’явіліся вялікія сучасныя інфармацыйныя ўстаноўкі. «Будзе дзейнічаць і сістэма штрых-кодаў, якая дазваляе ўладальнікам мабільных тэлефонаў, падключаных да інтэрнэта, атрымліваць дадатковую інфармацыю аб найбольш значных мясцінах беларускай сталіцы», — дадаў ён.

Ладуцька праінфармаваў аб тым, што цяпер у Мінску ідзе будаўніцтва новых гасцініц і гатэляў.

Так, найбліжэйшым часам адкрыецца гасцініца катэгорыі «3 зоркі» на 100 месцаў па вуліцы Інтэрнацыянальнай. Пасля рэканструкцыі ўвядуць у эксплуатацыю «Прэзідэнт-гатэль» і гасцініцу «Палёт». «Мы правялі конкурс на будаўніцтва гасцініцы і ў зоне аквапарка. Думаю, пачнём будаўніцтва праз месяц, — сказаў Ладуцька. — Конкурс выйграла турэцкая кампанія». Акрамя гэтага, новы гатэль з’явіцца на тэрыторыі Парка высокіх тэхналогій. «На нарадзе ў ПВТ мы канчаткова вызначыліся, што па Купрэвіча, 4, інвестар ніякіх укладанняў рабіць не будзе, таму мы самі гэтую тэрыторыю забудуем, — патлумачыў мэр горада. — Тут пабудуем гасцініцу такую ж, якія будуем сёння ў панэльным варыянце ў Цэнтральным, Ленінскім і Кастрычніцкіх раёнах Мінска. Архітэктура гэтай гасцініцы ўпішацца ў забудову ПВТ».

Гасцей чэмпіянату плануецца рассяляць і ў студэнцкіх інтэрнатах, а таксама ў дзіцячых лагерах, якія спецыяльна для гэтага падрыхтуюць. Усяго падчас чэмпіянату свету па хакеі ў Мінску адначасова змогуць размясціць 20 тыс. турыстаў.

У сваю чаргу дырэктар Нацыянальнага агенцтва па турызме Вячаслаў Чарноў адзначыў, што вялікая ўвага надаецца распаўсюджванню інфармацыі пра чэмпіянат за мяжой. «Мы ўдзельнічаем у найбуйнейшых міжнародных турыстычных выставах, дзе інфармуем аб чэмпіянаце, умовах яго правядзення. Усё гэта цікава замежным тураператарам», — лічыць спецыяліст.

Марына Носава, БелаПАН.

Чытайце таксама:

Каментары да артыкула