Pieršyja bilety na ČS pa chakiei ŭ Minsku pastupiać u prodaž u sakaviku 2013 hoda

23.08.2012 / 11:15

Pieršyja bilety na čempijanat śvietu pa chakiei 2014 hoda ŭ Minsku pastupiać u prodaž u sakaviku-krasaviku 2013 hoda. Ab hetym paviedamiŭ staršynia Minharvykankama Mikałaj Ładućka 22 žniŭnia na pasiadžeńni arhkamiteta pa padrychtoŭcy da mierapryjemstva. U im uziaŭ udzieł prem'jer-ministr Biełarusi Michaił Miaśnikovič.

«Važna, kab u Minharvykankama, Minsporta była zvarotnaja suviaź ź ludźmi. Treba vyvučyć mierkavańni taksistaŭ, uładalnikaŭ restaranaŭ i inšych zacikaŭlenych, jak najlepš usio arhanizavać, kab zabiaśpiečyć maksimalna kamfortnyja ŭmovy dla žycharoŭ i haściej stalicy», — cytuje Miaśnikoviča pres-słužba ŭrada. Prem'jer-ministr daručyŭ šyroka zadziejničać dla hetaha srodki masavaj infarmacyi.

«Dla nas heta maštabnaje imidžavaje mierapryjemstva ŭ vačach suśvietnaj spartyŭnaj supolnaści», — padkreśliŭ Ładućka. Jon nazvaŭ tempy padrychtoŭčych rabot da čempijanatu zdavalniajučymi. Užo padrychtavanyja infarmacyjnyja materyjały i błok daviednikaŭ, jakija dazvolać haściam Minska bolš daviedacca pra Biełaruś i jaje stalicu. U centralnaj častcy horada źjavilisia vialikija sučasnyja infarmacyjnyja ŭstanoŭki. «Budzie dziejničać i sistema štrych-kodaŭ, jakaja dazvalaje ŭładalnikam mabilnych telefonaŭ, padklučanych da interneta, atrymlivać dadatkovuju infarmacyju ab najbolš značnych miaścinach biełaruskaj stalicy», — dadaŭ jon.

Ładućka prainfarmavaŭ ab tym, što ciapier u Minsku idzie budaŭnictva novych haścinic i hatelaŭ.

Tak, najbližejšym časam adkryjecca haścinica katehoryi «3 zorki» na 100 miescaŭ pa vulicy Internacyjanalnaj. Paśla rekanstrukcyi ŭviaduć u ekspłuatacyju «Prezident-hatel» i haścinicu «Palot». «My praviali konkurs na budaŭnictva haścinicy i ŭ zonie akvaparka. Dumaju, pačniom budaŭnictva praź miesiac, — skazaŭ Ładućka. — Konkurs vyjhrała tureckaja kampanija». Akramia hetaha, novy hatel źjavicca na terytoryi Parka vysokich technałohij. «Na naradzie ŭ PVT my kančatkova vyznačylisia, što pa Kupreviča, 4, inviestar nijakich układańniaŭ rabić nie budzie, tamu my sami hetuju terytoryju zabudujem, — patłumačyŭ mer horada. — Tut pabudujem haścinicu takuju ž, jakija budujem siońnia ŭ panelnym varyjancie ŭ Centralnym, Leninskim i Kastryčnickich rajonach Minska. Architektura hetaj haścinicy ŭpišacca ŭ zabudovu PVT».

Haściej čempijanatu płanujecca raśsialać i ŭ studenckich internatach, a taksama ŭ dziciačych łahierach, jakija śpiecyjalna dla hetaha padrychtujuć. Usiaho padčas čempijanatu śvietu pa chakiei ŭ Minsku adnačasova zmohuć raźmiaścić 20 tys. turystaŭ.

U svaju čarhu dyrektar Nacyjanalnaha ahienctva pa turyźmie Viačasłaŭ Čarnoŭ adznačyŭ, što vialikaja ŭvaha nadajecca raspaŭsiudžvańniu infarmacyi pra čempijanat za miažoj. «My ŭdzielničajem u najbujniejšych mižnarodnych turystyčnych vystavach, dzie infarmujem ab čempijanacie, umovach jaho praviadzieńnia. Usio heta cikava zamiežnym turapierataram», — ličyć śpiecyjalist.

Maryna Nosava, BiełaPAN.

Čytajcie taksama:

Kamientary da artykuła