Kiraŭnik Miedžlisa krymskich tatar: Rašeńnie pra ŭvachodžańnie ŭ skład RF pryniali varjaty
Situacyja ŭ Krymie raźvivajecca vielmi imkliva, i mižnarodnaja supolnaść pavinna terminova dziejničać dla abarony terytaryjalnaj cełasnaści Ukrainy. Pra heta zajaviŭ u efiry «Hramadskaha TB» kiraŭnik Miedžlisa krymskich tataraŭ Refat Čubaraŭ.
Refat Čubaraŭ, fota Radyjo Svaboda
Jon raspavioŭ, što rašeńnie Viarchoŭnaj Rady ARK ab «uvachodžańni ŭ skład Rasii» prymali varjaty. «Akramia taho, što niama zakona ab miascovych refierendumach, samo rašeńnie absurdna. Jany pieršym punktam pryniali rašeńnie «ŭvajści» ŭ skład Rasijskaj fiederacyi, a druhim — vynosiać pytańnie na refierendum», — aburyŭsia Čubaraŭ.
Jon raspavioŭ, što krymskija tatary nie pryznajuć i nie pryznajuć nijakaha refierendumu va ŭmovach akupacyi.
«Na pasiadžeńni Miedžlisa my pryniali rašeńnie, što luby refierendum va ŭmovach adsutnaści zakonaŭ va Ukrainie, kali na vulicach pieramiaščajucca ŭzbrojenyja sałdaty i bajavaja technika, jon nie moža być praviedzieny», — zajaviŭ Čubaraŭ.
«Zaraz vielmi važna, kab užo ŭ pieršyja hadziny my ŭbačyli praktyčnyja kroki ad mižnarodnaj supolnaści. Situacyja imčycca z šalonaj chutkaściu ŭ prorvu», — dadaŭ jon.
Kiraŭnik Miedžlisa raspavioŭ, što ŭ sieradu «ułady Kryma» sabrali meraŭ i kiraŭnikoŭ miascovych administracyj i zahadali rychtavać kamisii dla praviadzieńnia «refierendumu». Pry hetym, kaža Čubaraŭ, pakolki śpisy vybarščykaŭ krymskija ŭłady atrymać nie mohuć, to ich taksama daručyli farmavać miascovym uładam. Čubaraŭ nazvaŭ taki praces «vyrodlivym».
Jon raspavioŭ, što krymskija tatary razam ź inšymi nacyjanalnaściami sprabujuć zachavać situacyju stabilnaj i nie paddavacca na pravakacyi.
«My sprabujem maksimalna zachavać spakoj, nie rabić dziejańniaŭ, jakija buduć uspryniatyja jak ahresija da vojskaŭ. Bo my razumiejem, što toj bok nie admoviŭsia ad dumki zładzić šyrokamaštabnuju pravakacyju», — raspavioŭ Čubaraŭ.
Jon taksama patłumačyŭ technałohiju arhanizacyi pravakacyj «atradaŭ samaabarony», siarod jakich šmat zamiežnikaŭ, u pieršuju čarhu rasijskich kazakoŭ.
«Jany ŭzbrojenyja, jany ŭstupajuć u peŭnuju kanfliktnuju situacyju ź miascovym nasielnictvam abo z vajskoŭcami ŭ błakiravanych častkach, a potym užo padciahvajucca vajskoŭcy», - raspavioŭ Čubaraŭ.