Parłamient Kryma pryniaŭ siońnia, 6 sakavika, rašeńnie ab uvachodžańni aŭtanomii ŭ skład Rasii, paviedamlaje Rasijskaje infarmacyjnaje ahienctva «Naviny».
«Uvajści ŭ skład Rasijskaj Fiederacyi na pravach subjekta Rasijskaj Fiederacyi», — havorycca ŭ tekście rašeńnia, jakoje ahienctvu pieradaŭ deputat Viarchoŭnaj Rady Kryma Siarhiej Šuvajnikaŭ. Za takoje rašeńnie nibyta prahałasavali 78 z 81 deputata.
«Tolki što Viarchoŭnaja Rada Kryma pryniała histaryčnaje rašeńnie ab ustupleńni ŭ skład Rasijskaj Fiederacyi! Za 78 deputataŭ z 81!» — napisaŭ vice-premjer ARK Rustam Ciemirhalijeŭ.
U tłumačalnaj zapiscy da pastanovy, u pryvatnaści, adznačajecca, što «padziei, jakija adbylisia ŭ lutym 2014 hoda ŭ h. Kijevie, rezka abvastryli hramadska-palityčnuju situacyju va Ukrainie. Nacyjanalistyčnyja siły, jakija zachapili ŭ vyniku antykanstytucyjnaha pieravarotu ŭładu, hruba parušajuć Kanstytucyju i zakony Ukrainy, nieadjemnyja pravy i svabody hramadzian, uklučajučy prava na žyćcio, svabodu dumki i słovy, prava razmaŭlać na rodnaj movie. Ekstremisckija hrupoŭki raspačali šerah sprob praniknieńnia ŭ Krym u metach abvastreńnia situacyi, eskałacyi napružanaści i niezakonnaha zachopu ŭłady».
Krymskija deputaty, «vykazvajučy vielizarnuju tryvohu ŭ dačynieńni da hramadska-palityčnaj situacyi, što stvaryłasia vakoł Krymu» pastanavili:
1. Uvajści ŭ skład Rasijskaj Fiederacyi ŭ jakaści subjekta RF.
2. Pryznačyć na 16 sakavika 2014 hoda ahulnakrymski refierendum (uklučajučy h. Sievastopal), na jaki vynieści nastupnyja alternatyŭnyja pytańni:
1) Vy za ŭźjadnańnie Kryma z Rasijaj na pravach subjekta Rasijskaj Fiederacyi?
2) Vy za adnaŭleńnie dziejańnia Kanstytucyi Respubliki Krym 1992 i za status Kryma jak častki Ukrainy?
3. Pytańnie, jaki atrymała bolšaść hałasoŭ, ličycca pytańniem, jakoje vykazvaje pramoje volevyjaŭleńnie nasielnictva Kryma.
(…)
9. Viarchoŭnaja Rada ARK źviarnułasia da prezidenta Rasijskaj Fiederacyi i Fiederalnaha schodu Dziaržaŭnaj Dumy Rasijskaj Fiederacyi z prapanovaj ab pačatku pracedury ŭvachodžańnia ŭ skład Rasijskaj Fiederacyi ŭ jakaści subjekta Rasijskaj Fiederacyi».
Raniej paviedamlałasia, što refierendum pryznačany na 16 sakavika.
Nahadajem, što ad 26 lutaha budynak parłamienta Kryma zachopleny rasijskim śpiecnazam. Žurnalistaŭ u budynak nie dapuskali, padlik hałasoŭ pravieryć niemahčyma. Urad uznačaliŭ lidar partyi «Ruskaje adzinstva», jakaja nabrała ŭsiaho 4% hałasoŭ na apošnich parłamienckich vybarach.
Akruhovy administracyjny sud Kijeva prypyniŭ dziejańnie šerahu rašeńniaŭ, pryniatych Viarchoŭnaj Radaj Aŭtanomnaj Respubliki Krym, u tym liku i ab praviadzieńni refierendumu.
Hienieralnaja prakurora Ukrainy pačała kryminalnyja spravy ŭ dačynieńni da «pryznačanaha parłamientam» Kryma premjeram aŭtanomii Siarhieja Aksionava i śpikiera VR ARK Uładzimira Kanstancinava pa č. 1 art. 109 Kryminalnaha kodeksa Ukrainy (dziejańni, nakiravanyja na hvałtoŭnaje źmianieńnie abo źviaržeńnie kanstytucyjnaha ładu ci na zachop dziaržaŭnaj ułady).
Anieksija Rasijaj Kryma budzie aznačać razbureńnie sistemy mižnarodnych damovaŭ ab nieparušnaści miežaŭ, jakaja skłałasia paśla Druhoj suśvietnaj vajny.
Kamientary