U Kitai prademanstravali najnoŭšuju madyfikacyju sistemy SPA «Chuncy-10»
«Chuncy-10» — heta kitajskaja kopija rasijskaha kompleksu S-300.
Kitajskaje telebačańnie ŭ prajm-tajm prademanstravała novuju viersiju kompleksaŭ supraćpavietranaj abarony «Chuncy-10» (HongQi-10). Pra heta piša piekinskaje anhłamoŭnaje vydańnie Global Times.
Na televizijnych kadrach zienitnyja rakiety, vypuščanyja z karabloŭ i naziemnych mabilnych ustanovak, źniščali pavietranyja abjekty.
«U jakaści srodku abarony sistema» «Chuncy-10» «zdolnaja nadzvyčaj chutka źbivać nizkalotnyja rakiety, jakija nie mohuć pierachapić łakalnyja sistemy abarony», — cytuje telekanał namieśnika hałoŭnaha redaktara kitajskaha vydańnia «Sučasnyja karabli» Łań Junia.
Pavodle jaho słovaŭ, rakiety «Chuncy-10» mohuć źniščać mety navat na vyšyni 1,5—10 m nad uzroŭniem mora i navodziacca na cel za 10 siekund.
«Chuncy-10» buduć vykarystoŭvać dla abarony karabloŭ na blizkich dystancyjach, a taksama ŭ łakalnych sistemach abarony, jakaja pakryvaje bolšuju zonu dziejańnia, ale dziejničaje mienš apieratyŭna.
Akramia hetaha, «Chuncy-10» zdolnaja abaraniać naziemnyja siły ad źniščalnikaŭ, bieśpiłotnikaŭ i kryłatych rakiet.
Uvohule, «Chuncy-10» — heta kitajskaja kopija rasijskaha kompleksu S-300, jaho ŭ Padniabiesnaj vypuskajuć pa licenzii. Damoŭlenaść pra heta była dasiahnuta ŭ 1993. Tady ž kitajskaja armija atrymała pieršuju techniku z Rasii. A ŭ 1995 pačaŭsia vypusk kompleksaŭ na kitajskich zavodach.
Z časam kitajcy pačali vypuskać madernizavanyja viersii sistemy «Chuncy-15», «Chuncy-16», «Chuncy-17» i «Chuncy-18». Jany dasiahnuli bolšaj dalnaści. Niekatoryja ličać, što kitajskija madyfikacyi S-300 pieraŭzyšli navat rasijski aryhinał.
Biełaruskaja armija taksama maje na ŭzbrajeńni rasijskija S-300. Sama Rasija vyrablaje najnoŭšuju viersiju S-400.
«Chuncy» ŭ pierakładzie z kitajskaj aznačaje «čyrvony ściah».