«Hazprom» skaraciŭ pastaŭki hazu va Ŭkrainu napałovu
abnoŭlena
Pra heta paviedamiŭ aficyjny pradstaŭnik «Hazpromu» Siarhiej Kupryjanaŭ, paśla taho, jak u 19 hadzinaŭ pa mienskim časie skončyŭsia termin, adviedzieny rasiejskaj kampanijaj «Naftahazu» na pahašeńnie zapazyčanaści.
Nibyta tolki za sutki było adabrana 104 młn kub. m hazu, što składaje kala 70 % sutačnaha abjomu pastavak. U adkaz «Hazprom» paabiacaŭ siońnia a 19‑j skaracić abjom pastavak jašče na 25%. Skaračeńnie pastavak paliva na 50% zrobić vidavočnym mahčymy niesankcyjanavany adbor hazu ŭkrainskim bokam, miarkujuć u «Hazpromie». Aficyjny pradstaŭnik chołdynhu Siarhiej Kupryjanaŭ paviedamiŭ, što nahodaj dla žorstkich zachadaŭ kampanii stała toje, što Ŭkraina nie raźličyłasia za rasiejski haz i nie padpisała novych kantraktaŭ. Jon zaklikaŭ vyrašać hetyja pytańni za stałom pieramovaŭ, paviedamlaje Hazieta.ru.
Rasiejskija analityki Alaksiej Makarkin i Dźmitry Abzałaŭ miarkujuć, što ciapier ŭ «Hazpromu» źjaviŭsia šaniec davieści niazdolnaść Ukrainy vykonvać svaje abaviazki pa bieśpierabojnym tranzycie rasiejskaha hazu ŭ Zachodniuju Eŭropu. Bieskampramisnaść chołdynhu pavinna prademanstravać biessensoŭnaść handlu ŭ pytańniach vyznačeńnia cenaŭ na haz inšym udzielnikam rynku, i Biełarusi ŭ tym liku.
Sa svajho boku NAK «Naftahaz‑Ukraina» vystupiŭ z zajavaj, što abmiežavańnie pastavak hazu va Ŭkrainu supiarečyć hałoŭnamu pryncypu techničnych umovaŭ uzajemaadnosinaŭ pamiž kampainiami ŭ hazavaj sfery. A mienavita, zabieśpiačeńju «Naftahazam» bieśpierabojnaha i biezavaryjnaha tranzytu rasiejskaha hazu eŭrapiejskim spažyŭcam, pry ŭmovie zabieśpiačeńnia hazavaha balansu Ŭkrainy. Ukrainskaja kampanija zajaviła, što svoječasova dasłała ŭ Maskvu nieabchodnyja dakumenty dla ŭrehulavańnia adnosinaŭ u hazavaj sfery, adnak nie atrymała nijakich prapanovaŭ u adkaz. NAK «Naftahaz‑Ukraina» zapeŭniŭ, što harantuje bieśpierabojny tranzyt dla eŭrapiejskich spažyŭcoŭ datul, pakul heta nia budzie pahražać enerhietyčnaj biaśpiecy Ŭkrainy. Pavodle infarmacyi kampanii, jaje aficyjna nie paviedamili pra čarhovaje skaračeńnie pastavak hazu, a pieršaje skaračeńnie ad 3 sakavika skłała 32,2%, a nie 25%, jak zajaviŭ «Hazprom». Pradstaŭniki ŭkrainskaj kampanii vykazali hatoŭnaść vylecieć u Rasieju na pieramovy, paviedamiła RBK‑Ukrajina.
Nahadajem, što ŭpieršyniu ŭ hetym hodzie «Hazprom» pryhraziŭ skaračeńniem pastavak hazu va Ŭkrainu 10 lutaha. Tady, pavodle rasiejskaha boku, ciaham pieršych dźviuch miesiacaŭ biahučaha hodu Ŭkraina nibyta prysabiečyła 1 młrd 700 młn kubametraŭ rasiejskaha hazu i spažyvała «biez anijakich dakumentaŭ».
Toj kanflikt skončyŭsia pieramovami prezydentaŭ dźviuch krainaŭ u Maskvie, u vyniku jakich Ukraina dabiłasia admovy ad pasiarednikaŭ u pastaŭkach hazu i abaviazałasia spłacić biahučuju zapazyčanaść.
* * *
Uviečary aficyjny pradstaŭnik «Hazpromu» Siarhiej Kupryjanaŭ paviedamiŭ, što paśla taho, jak u 19 hadzinaŭ pa mienskim časie vyciek termin, adviedzieny rasiejskaj kampanijaj «Naftahazu» na pahašeńnie zapazyčanaści, «Hazprom» skaraciŭ pastaŭki hazu jašče na 25%.
Tym časam, jašče ŭčora Eŭrasajuz zaklikaŭ abiedźvie krainy da chutčejšaha ŭrehulavańnia hazavaha skandału, paviedamlaje Russkaja słužba BBC. «Eŭrakamisija zaklikała abodva baki znajści chutčejšaje i kančatkovaje rašeńnie kamercyjnaj prablemy. My praciahvajem uvažliva sačyć za raźvićciom sytuacyi», ‑‑ paviedamiŭ ŭ paniadziełak u Bruseli pradstaŭnik Eŭrakamisii Mišel Serkon.
Pavodle padlikaŭ ahienctva Interfaks, kožny dzień čarhovaha hazavaha kanfliktu Rasiei z Ukrainaj nanosić biełaruskamu biudžetu škodu na 140 tysiač dalaraŭ. U «Biełtranshazie» hetuju ličbu nie kamentujuć.
Ahladalnica hazety «Biełorusy i rynok» Taciana Manionak, u interviju Radyjo Svaboda zbolšaha pahadziłasia z takoj acenkaj.
«Sapraŭdy, Biełaruś nie atrymlivaje hetych hrošaj za prapampoŭvańnie hazu va Ŭkrainu praz našu terytoryju. Heta za tuju častku, jakaja pastaŭlałasia praz našu hazavymiaralnuju stancyju «Mazyr». Straty pryblizna takija», — miarkuje Taciana Manionak.
Kali ad hetaha kanfliktu ciarpić biełaruski biudžet, to ci nie pasprabuje Biełaruś pryśpiešyć jaho raźviazańnie? Taciana Manionak taki ŭdzieł Biełarusi ŭ rasiejska‑ŭkrainskaj sprečcy vyklučaje. Jana nahadvaje, što ŭžo ciapier 25% akcyjaŭ «Biełtranshazu» naležyć rasiejskamu «Hazpramu», a praz try hady ŭ rasiejcaŭ budzie pałova akcyjaŭ. «U hetym kanflikcie Biełaruś budzie na baku Rasiei abo prosta admaŭčycca», — prahnazuje Taciana Manionak. Adnak žurnalistka miarkuje, što salidarnaja z Ukrainaj pazycyja ŭ peŭnych palityčnych umovach była b karysnaja:
«Kali b Biełaruś i Ŭkraina vystupili salidarna, jak tranzytnyja krainy, razam było b lahčej zmahacca z manapalistam‑«Hazpramam». Ale pakul kožnaja kraina vytarhoŭvaje sabie ŭmovy samastojna. Biełaruś heta robić pakul paśpiachova. Na pieršy kvartał my majem vielmi spryjalnyja košty, i heta moža zachavacca na ŭvieś hod».
Taciana Manionak miarkuje, što ciapierašni kanflikt pamiž «Hazpramam» i ŭkrainskim uradam na čale ź Julaj Cimašenkaj budzie vyrašany praź niekalki dzion: baki znojduć kampramis. «Inakš pryjdziecca znoŭ abmiažoŭvać pastaŭki ŭ Eŭropu, a paŭtareńnia hetaha skandału nichto nie zachoča», — kaža Taciana Manionak.
Uviečary stała viadomaja reakcyja Eŭrasajuzu: jon patrabuje bieśpierabojnaści pastavak.