Ale hetym razam jana aznačaje pieramohu linii Julii Cimašenki i kaniec nieprazrystych schiemaŭ. Ukraina dabiłasia admovy ad ćmianych pasiarednikaŭ u pastaŭkach hazu i abaviazałasia spłacić biahučuju zapazyčanaść. Takija damoŭlenaści byli dasiahnutyja na sustrečy prezydentaŭ Ukrainy i Rasiei ŭ Maskvie.
Ukraina dabiłasia admovy ad ćmianych pasiarednikaŭ u pastaŭkach hazu i abaviazałasia spłacić biahučuju zapazyčanaść.
Rasieja nia stała adklučać haz Ukrainie. Kijeŭ pačnie pahašać zapazyčanaść pierad «Hazpramam» ź čaćviarha. Takija damoŭlenaści byli dasiahnutyja na sustrečy prezydenta Ŭkrainy Viktara Juščanki i prezydenta Rasiei Ŭładzimiera Pucina.
Na pačatku lutaha pamiž Ukrainaj i Rasiejaj razhareŭsia čarhovy hazavy kanflikt. Jaho spravakavała Julija Cimašenka: svaimi sprobami arhanizavać pabudovu hazapravodu z Turkmienii ŭ abychod Rasiei, a najpierš – dabicca, kab Maskva admoviłasia ad pasiarednika ŭ formie niajasna kamu naležnaj struktury RosUkrEnergo i pačała pradavać haz Kijevu naŭprost, pavodle pramych damovaŭ pamiž «Hazpromam» i «Naftahazam Ukrainy». Pry hetym padvyšeńnie cany na haz Cimašenka prapanoŭvała kampensavać pavyšeńniem taryfu na jaho transparciroŭku praz terytoryju Ŭkrainy.
Ukrainski ŭrad ad słovaŭ pra likvidacyju pasiarednikaŭ pierajšoŭ da spravaŭ. Spačatku Kabinet ministraŭ abmiežavaŭ prysutnaść «UkrHaz-Enerha» (daččynaj struktury RosUkrEnergo i NAK «Naftahaz Ukrainy») na ŭnutranym rynku. A 6 lutaha anulavaŭ svajo rasparadžeńnie ab stvareńni «UkrHaz-Enierho».
U adkaz u paniadziełak «Hazprom» pryhraziŭ z aŭtorka na čverć skaracić padaču rasiejskaha hazu va Ŭkrainu. Padstavaj stała zapazyčanaścm pa biahučych płaciažach u pamiery 1,5 młrd dalaraŭ. Pres-sakratar staršyni praŭleńnia AAT «Hazprom» Siarhiej Kupryjanaŭ supravadziŭ ultymatum adpaviednaj statystykaj: 1 młrd 700 młn kubametraŭ rasiejskaha hazu «asieli» va Ŭkrainie za studzień — luty 2008 hodu, davodziŭ jon.
Vykanać patrabavańni ŭkrainskamu boku prapanoŭvałasia akurat u dzień pryjezdu prezydenta Ŭkrainy Viktara Juščanki ŭ Maskvu.
Napiaredadni pajezdki V.Juščanki ŭ Maskvu ŭkrainskija ŭłady nia mieli adzinstva. Ju.Cimašenka vystupała za bolš radykalny padychod, prezydent Ukrainy nastojvaŭ na kampramisie. Urešcie ŭkraincy pahadzilisia na časovaje isnavańnie RosUkrEnergo — na pierachodny peryjad, pakul nia buduć vypracavanyja novyja ŭmovy kantraktaŭ. Raźlik rasiejcaŭ na kampramisny nastroj Juščanki apraŭdaŭ siabie: u časie aŭtorkavaj sustrečy prezydentaŭ Rasiei i Ŭkrainy była dasiahnutaja damoŭlenaść ab pahašeńni Kijevam zapazyčanaści pa biahučych płaciažach pačynajučy z čaćviarha. «My škadujem, što pastajanna ŭźjikajuć takija prablemy, — skazaŭ Pucin. — My damovilisia pra dalejšyja pryncypy supracoŭnictva i pra ŭmovy pahašeńnia doŭhu. «Hazprom» jany zadavalniajuć».
Pry hetym za pastaŭki 2008 h. Ukraina budzie płacić pa-raniejšamu $179 za tysiaču kubametraŭ. Rasiejski kiraŭnik zaznačyŭ taksama, što «Hazprom» i «Naftahaz» stvaryli rabočuju hrupu dla arhanizacyi pramych stasunkaŭ. «My zacikaŭleny, kab našaje supracoŭnictva było b hranična prazrystym», — zajaviŭ U. Pucin.
U sieradu ŭ Navasibirsku pieršy vice-premjer Dźmitry Miadźviedzieŭ zajaviŭ, što pry pastaŭkach siarednieazijackaha hazu va Ŭkrainu pasiarednik zachavajecca. Heta datyčycca ŭžo padpisanych kantraktaŭ.
Schiema pastavak turkmienskaha hazu pa hazpromaŭskich hazapravodach, ale praz pasiarednickuju kampaniju RosUkrEnergo była naviazanaja Ŭkrainie ŭ 2005 hodzie. RosUkrEnergo — struktura nastolki tajamničaja, što dahetul nichto da kanca nia viedaje, chto za joju staić. Asobnyja ŚMI pisali, što jaje prybytkami rasparadžajucca asoby, blizkija da Pucina. Inšyja śćviardžali, što V.Juščanka taksama maje da RosUkrEnergo dačynieńnie.
Sioletni hazavy kanflikt nahadaŭ raniejšyja sutyknieńni Rasiei z Ukrainaj i Biełaruśsiu. Uźniknieńnie takich sytuacyj było b niemahčymaje, kali b biełaruski i ŭkrainski ŭrady vypracavali supolnuju stratehiju dačynieńniaŭ z manapolijaj.
Pa słovach ahladalnicy hazety «Biełorusy i rynok» Taciany Manionak, peŭnyja pieramovy vialisia ciaham apošnich hadoŭ. «Pamiž krainami byli aprabavanyja adpaviednyja zachady i jany mieli efekt — maju źviestki, što Rasieju hiešefty Biełarusi i Ŭkrainy ŭ sfery tranzytu vielmi napałochali» — kaža T. Manionak. Ale pakul vidavočna, što kožny bok addaje pieravahu separatnym pieramovam z Rasiejaj. Biełaruś pry hetym kirujecca damoŭlenaściami, dasiahnutymi pry kancy 2006 h. Toje, što cana hazu dla Biełarusi na I kvartał biahučaha hodu była ahučanaja paśla vizytu ŭ našu krainu Ŭładzimiera Pucina, jašče raz śviedčyć, što pytańnie vyrašałasia ŭ palityčnaj płoskaści. Biełaruski bok karystajecca pieradvybarčaj sytuacyjaj u Rasiei vielmi aktyŭna. Heta źviazana z rostam cany na naftu i, adpaviedna, niepaźbiežnym rostam cany hazu.
Pavodle papiarednich źviestak, pa stanie na 1 studzienia 2009 h. rasiejski haz moža kaštavać dla biełarusaŭ kala $203 za tys. kub. m. Na apošnich pieramovach, što adbylisia z sankcyi kiraŭnika rasiejskaha ŭradu Viktara Zubkova, biełaruskaja delehacyja vystupała za pierahlad hetaj ličby. Pieramovy pakul skončylisia biezvynikova i majuć adnavicca ŭ sakaviku. Biełaruski bok kirujecca karotkaterminovymi perspektyvami atrymańnia ad «Hazpromu» sastupak — fiksavańnia niachaj i na karotki termin cenaŭ, «persanalnaj» formuły raźliku cany na haz i h. d.
Urad karystajecca tym, što rasiejcy nie hatovyja da hazavaj vajny na dva fronty, ale i sam namahajecca nie złavać manapoliju, zvažajučy na bahaty vybar u apošniaj sposabaŭ upłyvu na našuju ekanomiku.
«Na žal, enerhietyčnaja zaležnaść Biełarusi, i biez taho tatalnaja, jašče bolš pahłyblajecca, i ŭ karotkaj perspektyvie nie vypadaje čakać na supolnuju z ukraincami stratehiju dačynieńniaŭ z manapalistam», — zaznačyła T. Manionak.
Pozna ŭviečary ŭ aŭtorak źjaviłasia infarmacyja, što «Hazprom» i «Naftahaz» stvorać dźvie novyja kampanii dla pastavak hazu va Ŭkrainu. «Stvarajecca novaja struktura pastavak va Ŭkrainu hazu», – skazaŭ kiraŭnik rasiejskaha hazavaha chołdynhu Alaksiej Miler. Pa słovach Milera, buduć stvoranyja novaja zbytavaja kampanija (zamieś «Rosukrenerha») i novaja kampanija dla pastavak na ŭnutranym rynku (zamiest «Ukrhazeneha), u jakich «Hazpromu» j «Naftahazu» budzie naležać naŭprost pa 50 %.
Čarhovaja ničyja ŭ hazavaj vajnie hetym razam aznačaje pieramohu linii Julii Cimašenki i kaniec nieprazrystych schiemaŭ.
Kamientary