Asadzi nazad
Adzinuju ŭ Mahilovie biełaruskamoŭnuju hrupu pry dziciačym sadku № 81 pahražajuć zakryć, kali ŭ joj nia budzie prynamsi vaśmi dzietak. Ciapier tudy chodziać čaćviora małych.
U adździele adukacyi Leninskaha rajonu kažuć, što zacikaŭlenyja ŭ isnavańni hrupy, adnak kolkaść dziaciej u joj nie pavialičvajecca. Inicyjatary stvareńnia hrupy vinavaciać čynoŭnikaŭ, što tyja nie reklamujuć jaje jak śled i nie dajuć rabić heta inšym.
Pra mahčymaje zakryćcio adzinaj u Mahilovie biełaruskamoŭnaj hrupy zajaviŭ načalnik adździełu adukacyi Leninskaha rajonu Alaksandar Hapiejeŭ. Jon zakłapočany tym, što hrupa niedaŭkamplektavanaja:
«Mnie chaciełasia b chutčej, kab my da kanca hodu ŭkamplektavali hetuju hrupu. Kali my jaje nie ŭkamplektujem da pieršaha vieraśnia, ja vymušany budu vynieści pytańnie pra jaje zakryćcio. U hrupie pavinna być vosiem — dziesiać čałaviek minimum».
Pavodle spadara Hapiejeva, adździeł adukacyi robić usio, kab hrupa papaŭniałasia dziećmi:
«Reklamnuju kampaniju praviali ŭ sadkach, u hazecie dali abjavu. Ale nieachvotna niejak dzieci iduć. Chacia sadok dobry. Umovy dla dziaciej stvoranyja dobryja».
Baćki ž nie pahadžajucca z čynoŭnikami j kažuć, što dla reklamavańnia hrupy ničoha nia zroblena.
«My sprabavali im davieści, što treba supracoŭničać u tym, kab reklamavać hrupu. Nam skazali: «Heta naša sprava, nam treba ŭsio ž taki pad svajoj markaj vypuskać hetyja reklamnyja prajekty». Što, ułasna kažučy, nam nie dazvoliła padklučacca samastojna. Razam z tym pracy ź ich boku praktyčna nijakaj nie praviedziena. Jak było na pačatku hodu čaćviora dzietak, tak i zastałosia», — zaznačyŭ adzin ź inicyjataraŭ stvareńnia hrupy Alaksiej Baciukoŭ.
Čakałasia, što siońnia ŭ haradzkich hazetach źjaviacca reklamnyja abviestki pra biełaruskamoŭnuju hrupu. Hetaha, adnak, nie adbyłosia. Reklamu ŭ hazetach baćkam abiacali ŭ rajonnym adździele adukacyi. Tekst abjavy padrychtavaŭ i pieradaŭ u adździeł adukacyi Alaksiej Baciukoŭ.
Jašče adzin stvaralnik hrupy, Źmicier Sałaŭjoŭ, kaža pra niedavier čynoŭnikaŭ da inicyjatyŭnaści baćkoŭ:
«Toje, što źviazana z reklamavańniem. Heta adčuvajecca padčas hutarak z kiraŭnictvam, z Hapiejevym. Byŭ taki cikavy vyraz jaho: «Ja pavinien być upeŭnieny, što nia budzie bieł‑čyrvona‑biełych ściahoŭ, kali buduć zdymać». Ja dumaju, što ŭsio idzie da taho, kab cichieńka hetuju hrupu pryčynić. Maŭlaŭ, nie ŭdałosia, i ŭsio».
I Źmicier Sałaŭjoŭ, i Alaksiej Baciukoŭ pierakananyja, što začynić hrupu jany nie daduć. Što da reklamy, to joju baćki ciapier zojmucca sami.
U biełaruskamoŭnuju hrupu «Viasiołka» dziaciej pačali vadzić ad treciaha śniežnia. Spačatku ŭ joj było troje dzietak: Jalinka Sałaŭjova, Mikołka Baciukoŭ dy Paŭlik Mochaŭ, nieŭzabavie da ich dałučyŭsia Januš Siaredzin.
Pieršyja dva tydni dziaciej biełaruskamoŭnaj hrupy abjadnoŭvali ź dziećmi inšaj hrupy. Baćkoŭ takaja sytuacyja nie zadavoliła, i paśla hutarki z zahadčycaj dzieci «Viasiołki» pačali zastavacca na ceły dzień u svajoj hrupie. Ciapier žyćcio hrupy narmalizavałasia.
Biełaruskamoŭnaja hrupa źjaviłasia ŭ Mahilovie paśla amal piatnaccacihadovaha pierapynku.