Łukašenka prysvoiŭ najvyšejšy kłas dziaržsłužačaha Jarmošynaj
Alaksandr Łukašenka prysvoiŭ najvyšejšy kłas dziaržaŭnaha słužačaha Lidzii Jarmošynaj. Adpaviednyja ŭkaz № 472 ad 23 listapada 2015 h. byŭ apublikavany na Nacyjanalnym pravavym internet-partale.
«Prysvoić Staršyni Centralnaj kamisii Respubliki Biełaruś pa vybarach i praviadzieńni respublikanskich refierendumaŭ Jarmošynaj Lidzii Michajłaŭnie vyšejšy kłas dziaržaŭnaha słužačaha», — havorycca ŭ paviedamleńni.
Najvyšejšy kłas dziaržsłužačaha Lidzija Jarmošyna atrymała napiaredadni svajho 19-hodździa na pasadzie kiraŭnika CVK Biełarusi: jana była pryznačanaja staršynioj Centralnaj kamisii pa vybarach i praviadzieńni respublikanskich refierendumaŭ 6 śniežnia 1996 h.. Tady jana źmianiła na hetaj pasadzie Viktara Hančara.
Za 19 hadoŭ na pasadzie kiraŭnika Centrvybarkama Lidzija Jarmošyna praviała čatyry prezidenckija kampanii, čatyry parłamienckija kampanii i adzin refierendum.
Pa słovach Jarmošynaj, jana praviadzie parłamienckuju kampaniju ŭ 2016 hodzie. Adnak potym, u kancy hoda, u jaje minaje čaćviorty termin na pasadzie kiraŭnika CVK.