Kłasny kiraŭnik pra žychara Hrodna, što zahinuŭ za ID: Dobry chłopiec, tolki siamja nieščaślivaja
Pra zabojstva 33-hadovaha hrodzienca Dzianisa Vasiljeva paviedamili kurdy na sajcie Kurdish daily news, apublikavaŭšy fatahrafii jaho dakumientaŭ i bankaŭskich kartak.
Uvahu pryciahnuła napisańnie imia i proźvišča łacinkaj ź biełaruskaj movy. Choć sami dakumienty aŭstryjskija. Na adnoj z kartak značycca prava na pražyvańnie i pracu ŭ horadzie Brehienc, na inšych dakumientach bačnaja data naradžeńnia — 9 žniŭnia 1982 hoda, i miesca naradžeńnia: Biełaruś, Hrodna.
Viadoma, što Dzianis Vasiljeŭ daŭno źjechaŭ u Aŭstryju, atrymaŭ prytułak u hetaj krainie kala 10 hadoŭ tamu.
— Jon daŭno nie žyvie ŭ Biełarusi. Ale ŭ Hrodna jon pryjazdžaŭ, byŭ aformleny aficyjny vyjezd na PMŽ u Aŭstryju. Heta zdaryłasia jašče ŭ 2011 hodzie. Užo tady ŭ Dzianisa Vasiljeva była takaja zapaminalnaja barada, vonkava padobny na isłamistaŭ, — raspaviała krynica kp.by.
Dzianis sapraŭdy hrodzieniec — naradziŭsia ŭ hetym horadzie i ŭ apošni čas pryjazdžaŭ dadomu. Ale školnyja hady pravioŭ u nievialikim horadzie ŭ Homielskaj vobłaści.
— Jon pryjšoŭ u našu škołu ŭ 6-m kłasie, — raspaviała kp.by Viera Ivanaŭna, kłasny kiraŭnik Dzianisa Vasiljeva. — Jany pryjechali z maci z Hrodna. Chłopčyk vučyŭsia dobra, asabliva jamu padabalisia mova i litaratura. Ź dziećmi siabravaŭ, narmalny chłopčyk. Ale siamja nieščaślivaja — maci vypivała, pra baćku ničoha nie viedaju.
— Viedajecie, čym zajmaŭsia Dzianis paśla zakančeńnia škoły?
— Viedaju, što jon pajechaŭ dosyć daŭno na Zachad. Ja bačyła jaho fota na fonie hor. Na školnyja sustrečy nikoli nie prychodziŭ. Chłopčyki kazali, što padarožničaje, za miažoj. I maci kazała hetak ža. Čuła, što dobra uładkavaŭsia, dasyłaŭ maci hrošy. Ničoha drennaha pra jaho nie skažu.
Susiedzi ŭ Hrodnie: «Vietlivy, vietły, zaŭsiody vitaŭsia»
Nieprykmietnyja piacipaviarchoŭki znachodziacca ŭ adnym sa spalnych rajonaŭ Hrodna. Mienavita tut žyŭ Dzianis Vasiljeŭ. U kvatery, jakuju jon niekalki hadoŭ tamu zdymaŭ na vulicy Praletarskaj, ciapier žyvuć inšyja ludzi. Jany ničoha pra papiarednich kvatarantaŭ nie viedajuć. Adnak susiedzi adrazu ž apaznali pa apisańni maładoha čałavieka.
Dom, u jakim žyŭ Dzianis, fota Volhi Kamiahinaj, kp.by
— Tak, žyŭ u našym domie niekalki hadoŭ. Byŭ vietlivym, pryjaznym, zaŭsiody vitaŭsia. Kali treba było niešta dapamahčy, nikoli nie admaŭlaŭsia. Tut ža ŭ padjeździe šmat starych žyvie — im pastajanna patrebna niejkaja dapamoha.
Dzianis zapomniŭsia žycharam chruščoŭki svajoj baradoj i tym, što pieryjadyčna haniaŭ na matacykle pobač z domam. Małady čałaviek žyŭ nie adzin, a razam ź dziaŭčynaj. Dziaciej u ich nie było.
Jak kažuć susiedzi, u kastryčniku 2014 jon kančatkova źjechaŭ sa zdymnaj kvatery i bolš tut nie źjaŭlaŭsia.
U musulmanskaj supołcy Hrodna pra Vasiljeva ničoha nie viedajuć
— U Hrodnie nas mała, i my praktyčna ŭsie adzin adnaho viedajem. U našym kole Dzianis nie źjaŭlaŭsia. Vizualna my takoha čałavieka nie ŭzhadvajem, a jaho proźvišča ŭ našych razmovach ni razu nie zhadvałasia. Całkam mahčyma, što małady čałaviek pryniaŭ isłam, užo budučy za miažoj, — adznačyli ŭ musulmanskaj supołcy Hrodna.