Francyja zhurtavałasia suprać Nacyjanalnaha frontu
I heta paśla bliskučaj pieramohi ŭ pieršym tury.
Pa dadzienych ekzit-połaŭ, krajnie pravym nie ŭdałosia pieramahčy ŭ nivodnym rehijonie ŭ Francyi. Pavodle papiarednich dadzienych, u paŭnočnym rehijonie Nor-Pa-de-Kale-Pikardy Maryn Lo Pen prajhrała kandydatu ad pravaj partyi «Respublikancy» Ksaŭje Biertranu. Na poŭdni plamieńnica lidara Nacfronta Maryjon Marešal Lo Pien taksama sastupiła «respublikancu» Kryścijanu Estrazi.
Pavodle papiarednich dadzienych, na poŭnačy, u rehijonie Nor-Pa-de-Kale — Pikardy, Maryn Lo Pen nabiraje kala 42,3% hałasoŭ vybarščykaŭ. Jaje supiernik Ksaŭje Biertran apiaredžvaje lidara francuzskich ŭltrapravych z 57,7% hałasoŭ.
«Siońnia viečaram pieramoh ni ja, ni jakaja b tam ni było palityčnaja partyja. Siońnia pieramahli vybarščyki našaha rehijonu, heta ich pieramoha», — zajaviŭ Biertran, kamientujučy hetyja vyniki.
U rehijonie Pravans — Alpy — Błakitny Bierah maładaja plamieńnica Lo Pien, 26-hadovaja Maryjon Marešal Lo Pen atrymała 44,2% hałasoŭ. Mer Nicy ad partyi «Respublikancy» Kryścijan Estrazi zmoh nabrać 55,8%.
Nacyjanalny front pieramoh u pieršym tury rehijanalnych vybaraŭ. Partyja Maryn Lo Pen vyjšła napierad u šaści francuzskich rehijonach z 13.
U druhim tury usia ŭvaha była prykavana da paŭnočnaha rehijona Nor-Pa-de-Kale — Pikardyja i paŭdniovaha Pravans — Alpy — Błakitny Bierah, dzie Maryn Lo Pien i Maryjon Marešal Lo Pen pieramahli ź vialikim adryvam u pieršym tury.
Kiraŭnictva kirujučaj Sacpartyi vyrašyła pajści na «achviaru» i źniać svaje śpisy ŭ hetych rehijonach u druhim tury. Sacyjalisty zaklikali hałasavać za pradstaŭnikoŭ pravaj partyi «respublikancaŭ», kab takim čynam pieraharadzić darohu Nacfrontu.
Akramia taho, na praciahu hetaha tydnia ŭrad i šerah ŚMI pierakonvali francuzaŭ pryjści hałasavać, adznačajučy, što niajaŭka taksama zmoža pajści na karyść krajnie pravym. Pa dadzienych MUS Francyi, u druhim tury jaŭka istotna vyrasła i skłała 58%.
U pieršym tury vybaraŭ u hałasavańni pryniali ŭdzieł kala pałovy ad kolkaści zarehistravanych vybarščykaŭ.