MNS daŭ rekamiendacyi, jak pavodzić siabie padčas mocnaha śniehapadu
U Minsku raspracavany płan reahavańnia na nadzvyčajnyja situacyi, źviazanyja z mocnym vypadzieńniem apadkaŭ u vyhladzie śniehu «Zavieja».
BiełTA
Pra heta BiełTA paviedamiŭ pres-sakratar Minskaha haradskoha ŭpraŭleńnia MNS Vital Demboŭski.
«U adpaviednaści z płanam praduhledžana reahavańnie nie tolki padraździaleńniaŭ MNS, ale i ŭsich haradskich avaryjnych i kamunalnych słužbaŭ», — rastłumačyŭ jon.
Z-za niespryjalnaj abstanoŭki MNS rekamienduje hramadzianam, asabliva asobam stałaha vieku, biez asablivaj nieabchodnaści nie vychodzić na vulicu.
«Nasielnictvu ni ŭ jakim razie nielha karystacca niaspraŭnym kacielnym abstalavańniem. Toje ž samaje tyčycca elektraabahravalnikaŭ. Tym bolš zusim nie varta ŭklučać samarobnyja abahravalniki. U pryvatnych damach treba jašče raz pravieryć, ci spraŭnyja piečy. Usie niepaładki i raskoliny treba nieadkładna likvidavać», — padkreślili ŭ MNS.
Aŭtaŭładalnikam rekamiendujecca admovicca ad pajezdak (u asablivaści dalokich), a aŭtamabili parkavać takim čynam, kab jany nie pieraškadžali pracy śniehaŭboračnaj techniki.
Jak paviedamlałasia, mahutny cykłon pryjdzie ŭ Biełaruś 12 studzienia, abvieščana štarmavoje papiaredžańnie i aranžavy ŭzrovień niebiaśpieki. Cykłon budzie prachodzić z paŭdniovaha zachadu Jeŭropy praz centralnyja rehijony Biełarusi na paŭnočny ŭschod Rasii i pryniasie praciahłyja apadki (śnieh, mokry śnieh, na poŭdni z daždžom), zavirucha, nalipańnie mokraha śniehu, pa ŭschodzie čakajecca viecier z paryvami da 18 m/s.