Fotapastka dapamahła złavić žančynu, jakaja rehularna abkradała biezdapamožnuju babulu
U pasiołku Jeziaryšča Haradockaha rajona (Viciebskaja vobłaść) biespracoŭnaja susiedka ciaham niekalkich miesiacaŭ abkradała niamohłuju staruju babulu. Kradziažy vyjaviła dačka piensijanierki, jakaja časta pryjazdžała ź Viciebska ŭ hości da maci.
Pa nieviadomych pryčynach z doma stareńkaj haspadyni stali źnikać pradukty. Rastłumačyć heta źjavu dobrym apietytam babuli było niemahčyma — hety fakt abaviazkova zaŭvažyła b zamacavanaja za žančynaj sacyjalny rabotnik. U vyniku jany razam vyrašyli źviarnucca ŭ milicyju.
Pravaachoŭniki ŭstalavali ŭ chacie babuli fotapastku. Jana i dapamahła vyjści na śled padazravanaj.
Namieśnik prakurora Haradockaha rajona Maksim Zinovik ździŭlajecca vynachodlivaści hałoŭnaj fihurantki hetaj kryminalnaj historyi:
— Fotapastka vyrazna pakazała 48-hadovuju susiedku, jakaja, jak vyśvietliłasia, i naviedvałasia rehularna ŭ dom piensijanierki.
Karystajučysia niamohłaściu haspadyni, jana nieprykmietna padarožničała pa pakojach, a na šlachu zabirała ŭsio, što mahło spatrebicca ŭ haspadarcy — drobnyja rečy, kaŭbasu, majanez, chleb, ziefir, krupy. Dla taho, kab nie pakidać śladoŭ, śpiecyjalna adziavała valonki i palčatki. Praŭda, u fatalny dla siabie dzień, zachapiŭšysia pošukam charčovych prypasaŭ, palčatki zabyłasia na chaładzilniku. Dobry zdymak, zrobleny fotapastkaj i častka zhublenaha «ryštunku», dazvolili supracoŭnikam milicyi chutka ŭstalavać asobu padazravanaj.
U jaje domie vyjavili kradzienaje. Raspačali piać kryminalnych spraŭ.
Joj pahražaje pakarańnie ŭ vyhladzie pazbaŭleńnia voli na termin da 4 hadoŭ, niahledziačy na toje, što ahulny košt skradzienaha składaje kala 1,5 miljona.