U Pieciarburhu prapanavali nazvać most u honar Kadyrava
Tapanimičnaja kamisija Sankt-Pieciarburha pryniała rašeńnie parekamiendavać hubiernataru horada Hieorhiju Pałtaŭčanku nazvać most praz Duderhofski kanał u honar pamierłaha prezidenta Čačni Achmata Kadyrava.
Za taki krok prahałasavali dzieviać členaŭ kamisii z 17. Šaściora prahałasavali suprać, a jašče dvoje ŭstrymalisia. Hałasavańnie było tajnym.
Płany ŭviekaviečyć pamiać Achmata Kadyrava ŭ Sankt-Pieciarburhu vyklikali siarod žycharoŭ horada šyroki rezanans. Suprać hetaha rašeńnia vykazvalisia viadomyja dziejačy kultury.
Pavodle dadzienych ahienctva Interfaks, jašče bolš za hod tamu deputat Vital Miłonaŭ prapanavaŭ nazvać u honar Achmata Kadyrava vulicu ŭ Pieciarburhu, adnak hetaja inicyjatyva nie znajšła padtrymki. Tady siabry tapanimičnaj kamisii nie znajšli histaryčnaj suviazi žyćcia Kadyrava z paŭnočnaj stalicaj.
U pačatku hetaha hoda, jak raspavioŭ ahienctvu siabra tapanimičnaj kamisii Andrej Ryžkoŭ, z prapanovaj nazvać vulicu ŭ Pieciarburhu ŭ honar Achmata Kadyrava vystupili try hramadskija arhanizacyi — «Miłasernaść», «Siła Rasii» i «Nieŭskija bierahi».
«Prapanova taksama nie źmiaščała kankretyki, imia Achmata Kadyrava prasili ŭviekaviečyć z pryčyny zasłuh pierad Rasijskaj Fiederacyjaj. Kali rabočaja hrupa sabrałasia z tym ža prykładna vynikam, što i ŭ minułym hodzie [inicyjatyvu nie padtrymali], siarod kiraŭnikoŭ kamisii źjaviłasia dumka, što niadrenna b nazvać imiem Achmata Kadyrava novapabudavany most», — raspavioŭ Ryžkoŭ.
Padčas pieršaj čačenskaj vajny 1994-96 hadoŭ Achmat Kadyraŭ vajavaŭ na baku bajevikoŭ, a zatym pierajšoŭ na bok rasijskich fiederalnych sił, staŭšy pry Uładzimiry Pucinie prezidentam Čačni.
Achmat Kadyraŭ zahinuŭ u vyniku zamachu na jaho, paśla čaho nastupnym prezidentam respubliki staŭ jaho syn Ramzan.