Kanada vybačyłasia pierad indziejcami
Za toje, što prymušali 150 tys. dziaciej miascovych indziejcaŭ vučycca ŭ dziaržaŭnych chryścijanskich škołach. Viadoma mnostva faktaŭ fizyčnaha i seksualnaha hvałtu, jaki ciarpieli vučni. Mnohija ź ich zhadvajuć, jak ich łupcavali, kali jany razmaŭlali na svajoj movie.
Škoły, jakija spansavalisia dziaržavaj i kantralavalisia carkvoj, isnavali z kanca XIX st. i da 1990‑ch hadoŭ. Ich taksama nazyvali «indziejskimi škołami». Praŭda, niekatoryja ź ich byli začynienyja ŭ 1970‑ch.
Karcina «Karćje i abaryhieny» |
Chryścijanskija cerkvy Kanady vybačylisia jašče ŭ 1980‑yja hady.
Aŭstralija, dzie ŭ dačynieńni da abaryhienaŭ pravodziłasia padobnaja palityka, taksama pryniesła prabačeńni ŭ pačatku hetaha hodu.
Pavodle kanadzkaha premjera, vybačycca varta było daŭno.
«Ja staju zaraz pierad vami i prašu prabačeńnia ŭ byłych vučniaŭ indziejskich škoł. Staŭleńnie da dziaciej u hetych škołach — heta prykraja staronka ŭ našaj historyi».
Stefan Charper skazaŭ, što papiaredniaja systema zasnoŭvałasia na ŭpeŭnienaści, što kultura i jazyčnickija rytuały byli čymści nižejšym u dačynieńni da biełaj bolšaści.
Da taho ž indziejcy ličylisia asnoŭnymi vinoŭnikami raspaŭsiudu epidemij, schilnaści da ałkaholu i narkotykaŭ.
«Urad Kanady ščyra pieraprašaje vas za źnievažalnaje staŭleńnie i za toje, što ŭłady nia zdoleli vas abaranić», ‑‑ dadaŭ Charper.
Asambleja pieršych nacyj, jakuju pradstaŭlali starejšyny indziejskich plamionaŭ, žyva adhuknułasia i vitała taki krok z boku ŭradu.
«Narešcie my pačuli, jak Kanada vybačyłasia», ‑‑ skazaŭ kiraŭnik Asamblei Fił Fantejn.
Sam jon kaliści byŭ hvałtoŭna apraŭleny na vučobu ŭ indziejskuju škołe i adnym ź pieršych publična raspavioŭ pra toje, što ź im adbyvałasia padčas navučańnia.
Aproč vybačeńniaŭ siemji byłych vučniaŭ atrymajuć u jakaści kampensacyi za pakuty dva miljardy kanadzkich dalaraŭ, vypłatu jakich uziali na siabie ŭrad i kiraŭnictva chryścijanskaj carkvy.