Mužčynu, jaki kataŭ na rovary dochłaha barsuka, adpravili na lačeńnie
Sama historyja adbyłasia jašče ŭletku. 52-hadovy žychar Minskaha rajona Dźmitryj Siarhiejevič na aŭtamabili viartaŭsia z Hrodna. Za rul jon sieŭ niećviarozym i, jak vynik, na paŭdarozie, u rajonie aŭtazapravačnaj stancyi la vioscy Kianci, trapiŭ u DTZ. Jaho aŭtamabil źmiaścili na štrafstajanku, a mužčynu dastavili ŭ Lidu na miedahlad.
Paśla mužčynu adpuścili. Ale Dźmitryj Siarhiejevič, zamiest taho kab sieści ŭ aŭtobus i jechać dadomu, ź viełaparkoŭki la aŭtavakzała vykraŭ čužy rovar i adpraviŭsia ŭ vandroŭku, raspaviadaje padrabiaznaści «Lidskaja hazieta».
Jon pajechaŭ da trasy M6, mierkavana, bo ŭ adnoj ź viosak Iŭjeŭskaha rajona, pražyvali jaho svajaki. Adnak na abočynie darohi Dźmitryj Siarhiejevič ŭbačyŭ «siurpryz» - miortvaha barsuka. Mužčyna zakinuŭ žyviołu ŭ bahažnik i praciahnuŭ ruch.
Zatym mužčyna zajechaŭ u viosku Kianci, kinuŭ tam rovar razam z žyviołaj, ale nieŭzabavie byŭ zatrymany milicyjantami.
Zhodna z artykułam Kryminalnaha kodeksa Respubliki Biełaruś, pierasoŭvańnie (transparciroŭka) dzikich žyvioł, u tym liku zahinułych, abo ich častak zabaroniena i karajecca zakonam. Tym bolš kali heta žyvioła zaniesiena ŭ Čyrvonuju knihu. U takim vypadku Dźmitryj (ci na jaho miescy chto-niebudź inšy) abaviazany byŭ patelefanavać u milicyju (pa telefonie 102) abo ŭ arhanizacyju Biełaruskaha tavarystva palaŭničych i rybałovaŭ. Pakarańnie moža być suvorym — da 4 hadoŭ pazbaŭleńnia voli.
Materyjały spravy byli pieradadzienyja ŭ sud. U chodzie śledstva vyśvietliłasia, što Dźmitryj Siarhiejevič pakutuje na psichičnaje zachvorvańnie, jano prajaŭlajecca ŭ epizadyčna. U hetyja momanty jon stanovicca niekrytyčnym da svaich pavodzinaŭ i nie ŭśviedamlaje faktyčny charaktar svaich dziejańniaŭ. U suviazi z hetym mužčynu nakiravali na prymusovaje lačeńnie.