U Hrenłandyi vyjavili mozh žyvioły, jakaja žyła 500 miljonaŭ hod tamu
Hrupa navukoŭcaŭ ź Vialikabrytanii, Danii i Paŭdniovaj Karei vyjaviła na poŭnačy Hrenłandyi skamianiełyja reštki Kerygmachela kierkegaardi, staražytnaha marskoha členistanohaha. Na kamianiach zachavalisia adbitki struktury mozhu žyvioły, jakaja žyła na Ziamli z paŭmiljarda hadoŭ tamu, što dazvoliła daśledčykam vyłučyć novuju hipotezu ab evalucyi niervovaj sistemy bieschrybtovych. Daśledavańnie apublikavana ŭ časopisie Nature Communications.
Navukoŭcy pryjšli da vysnovy, što ŭ ahulnaha prodka chrybtovych i bieschrybtovych žyvioł mozh jašče nie mieŭ trochčastkovaj struktury. Mozh Kerygmachela kierkegaardi składajecca z adnaho adździeła.
«Kerygmachela źjaŭlajecca važnym źvianom pamiž členistanohimi i ich bližejšymi svajakami — cichachodkami i anichaforami (mozh jakich taksama nie padzieleny na try častki)», — zajaviŭ Jakabs Vinter z Univiersiteta Brystala dackamu partału videnskab.dk.
Vyvučany ŭzor žyvioły zmoh mnohaje raspavieści navukoŭcam taksama pra budovu vačej, jakija mieli ŭžo dosyć składanuju strukturu. Raniej ličyłasia, što ŭ pracesie evalucyi takija vočy u členistanohich źjavilisia ŭ bolš poźni čas.
Pradstaŭniki vidu Kerygmachela kierkegaardi žyli padčas Kiembryjskaha pieryjadu i byli marskimi drapiežnikami, dasiahajučy 20 sm u daŭžyniu. Vonkava jany nahadvali makryc, jakija pieramiaščalisia pad vadoj dziakujučy 22 «płaŭnikam», raźmieščanym pa bakach daŭhavataha cieła, jakoje na adnym kancy skančałasia doŭhim chvastavym šypom, a na inšym — paraj šypoŭ-kaniečnaściaŭ, jakija vykarystoŭvalisia dla taho, kab chapać i adpraŭlać u pašču achviaru.