Lidar pratestaŭ u Jerevanie špitalizavany ź irvanymi ranami
Paśla siońniašnich sutyčak na praśpiekcie Bahramiana ŭ armianskaj stalicy kiraŭnik partyi «Hramadzianski dahavor» i kiraŭnik parłamienckaj frakcyi «Vychad» Nikoł Pašynian, dastaŭleny ŭ balnicu ź irvanymi ranami, paviedamlaje Interfaks.
«Padčas sutyknieńnia Pašynian zvaliŭsia na kalučy drot, atrymaŭ irvanyja rany», — skazaŭ Interfaksu pres-sakratar frakcyi Tyhran Avinian.
Kalučy drot raściahnuła palicyja. Taksama, paviedamlajuć infarmahienctvy, suprać demanstrantaŭ užyvalisia ślezaciečny haz i šumavyja hranaty.
Usiaho, jak paviedamlajecca, u balnicy trapili 33 čałavieki. U absalutnaj bolšaści — demanstranty U traich špitalizavanych palicejskich lohkija ranieńni.
Niekalki hadzin tamu Pašynian zaklikaŭ prychilnikaŭ adpravicca da budynka parłamienta, paśla čaho častcy demanstrantaŭ udałosia prarvać ačapleńnie palicyi.
Siońnia sotni aktyvistaŭ i studentaŭ błakavali centralnyja vulicy armianskaj stalicy, što paralizavała ruch transpartu na mnohich učastkach horadu.
Tak pratestoŭcy sprabujuć praduchilić padaŭžeńnie ŭłady Sierža Sarhsiana ŭžo na pasadzie premjer-ministra. Hałasavańnie pa kandydatury eks-prezydenta ŭ parłamiencie pryznačana na 17 krasavika.
Kraina pierachodzić da parłamienckaj formy kiravańnia. Kiravać dziaržavaj stanie premjer-ministar. Kiroŭnaja Respublikanskaja partyja Armienii 14 krasavika vyłučyła na hetuju pasadu Sarhsiana, jaki z 2008 pa 2018 hady byŭ prezidentam.