Šunievič ab pahoni sa stralboj u Minsku: Milicyja dziejničała pravamierna
Pry zatrymańni kiroŭcy «Aŭdzi», jaki zładziŭ honki ź inśpiektarami pa stalicy, supracoŭniki DAI dziejničali pravamierna. Pra heta BIEŁTA paviedamiŭ ministr unutranych spraŭ Ihar Šunievič.
«Pierakanany, što supracoŭniki dziejničali pravamierna (heta samo saboj zrazumieła, acenka hetamu dadziena) i dosyć prafiesijna, bo nichto nie paciarpieŭ, a heta samaje hałoŭnaje», — padkreśliŭ Ihar Šunievič.
Ministr adznačyŭ, što zakon dazvalaje vykarystoŭvać zbroju dla spynieńnia transpartnaha srodku, kali kiroŭca nie padparadkoŭvajecca zakonnym patrabavańniam ab spynieńni i jaho dziejańni stvarajuć realnuju pahrozu žyćciu abo zdaroŭju hramadzian.
«Supracoŭniki DAI, jakija, darečy, vielmi surjozna padrychtavany dla takich vypadkaŭ, u asnoŭnaj svajoj masie dziejničajuć, na moj pohlad, vielmi ŭzvažana i pradumana, niahledziačy na krytyčnaść situacyi. I samaje hałoŭnaje, što nastupstvy hetych dziejańni zaŭsiody dastatkova prymalnyja, — skazaŭ ministr. — Zakon dazvalaje prymianiać zbroju, kab spynić hety transpartny srodak, ale ŭ horadzie heta rabić patencyjna niebiaśpiečna. My zaŭsiody zychodzim z taho, što jość apošni šaniec, apošniaja nadzieja, što toj, kaho pieraśledujuć, apamiatajecca, spynicca, zdasca na litaść uładam i nie budzie paharšać situacyju».