Kiraŭnik BRSM paraŭnaŭ fakty pra represii NKVD suprać biełaruskaj intelihiencyi z prahramami Ren-TV
dadalisia vybačeńni
Haračaja dyskusija razharełasia ŭ supołcy BRSM Ukantakcie. Niekatoryja karystalniki sacyjalnaj sietki pacikavilisia, ci budzie BRSM na hadavinu rasstrełu NKVD biełaruskaj intelihiencyi arhanizoŭvać jakoje-niebudź aśvietnickaje maładziožnaje mierapryjemstva.
Ustupiŭ u dyskusiju i kiraŭnik moładzievaj arhanizacyi Dźmitryj Varaniuk. Jon napisaŭ nastupnaje:
— Davajcie da sutnaści. Vy historyk? Prafiesar? Majecie navukovyja publikacyi? Kali tak, budu rady aznajomicca. I tady pryvieści taksama histaryčnyja fakty. Kidacca ž faktami ŭ styli prahram Ren-TV pra rasstreły mnie nie chočacca. Dla nas, dla Sajuza moładzi 29 — śviatočnaja data i my praviadziem jaje z karyściu [dzień stvareńnia VŁKSM — red.]. Pahutarym z hodnymi ludźmi, jakija budavali našu krainu. Papracujem nad navakolnym dobraŭparadkavańniem i skažam dziakuj vieteranam. Usio. Buduć pytańni jašče — pišycie ŭ pryvat, nie zaśmiečvajcie tryźnieńniem.
Nahadajem, u noč z 29 na 30 kastryčnika 1937 hoda savieckija śpiecsłužby rasstralali bolš za sto pradstaŭnikoŭ biełaruskaj intelihiencyi — litarataraŭ, navukoŭcaŭ, dziaržaŭnych dziejačaŭ. Siarod źniščanych— takija tvorcy, jak Michaś Čarot, Aleś Dudar, Michaś Zarecki, Płaton Hałavač, Juli Taŭbin, Anatol Volny, Todar Klaštorny, Jurka Lavonny, Valer Marakoŭ i mnohija inšyja.
Taksama 29 kastryčnika, ale ŭ 1918 hodzie, byŭ stvorany VŁKSM. Jubilej jaho stvareńnia źbirajecca śviatkavać BRSM.
Dapoŭniena: Dźmitryj Varaniuk apublikavaŭ na svajoj staroncy vybačeńni ludziam, los jakich zakranuli padziei masavych rasstrełaŭ na terytoryi Biełarusi, kaho mahli abrazić jaho słovy pra REN-TV.