Futbalista Illu Łuchviča pakinuli na sutki. Na jaho i jaho dziaŭčynu mohuć jašče i zavieści spravu za machlarstva
Ciapier los «futbalista-honščyka» Illi Łuchviča budzie vyrašać Śledčy kamitet.
Chłopca pakinuli pad vartaj jak minimum da 24 studzienia.
Hetuju infarmacyju «Našaj Nivie» paćvierdziŭ baćka chłopca Alaksandr Łuchvič.
Čytajcie: Futbalist haniaje pa Minsku na darahoj mašynie i fiksuje «podźvihi»-parušeńni ŭ siabie ŭ instahramie VIDEA
Čytajcie: «Futbalista-honščyka» Łuchviča zatrymali, mamčyna aŭto aryštavali. Baćka: Mnie soramna za syna
Tym časam aficyjny pradstaŭnik Śledčaha kamiteta Julija Hančarova paviedamiła, što spravaj hora-futbalista ciapier zajmajecca Śledčy kamitet. Pravodzicca pravierka, pa jaje vynikach budzie — ci nie budzie — razhladacca pytańnie ab zaviadzieńni kryminalnaj spravy za machlarstva. A heta da 3 hadoŭ pazbaŭleńnia voli (kali machlarstva ździejśnienaje nieadnarazova — to navat da 4 hadoŭ).
U čym kankretna padazrajuć Łuchviča, śledčyja pakul nie ŭdakładnili.
Pryčym pravierka pravodzicca nie tolki ŭ dačynieńni da Illi, ale i da jaho 18-hadovaj dziaŭčyny Nastaśsi, jakaja, darečy, vučycca ŭ Akademii MUS na pieršym kursie.
Illa i Anastasija, fota ź Instahrama
Nahadajem, Illa Łuchvič adznačyŭsia šmatlikimi parušeńniami praviłaŭ darožnaha ruchu, jakija sam zdymaŭ na videa i sam vykładvaŭ u sieciva. Jeździŭ jon na usiedarožniku «Infinici», jaki naležyć jaho maci. Časam na «Infinici» chłopiec prymacoŭvaŭ čyrvona-sinija lichtary, vielmi padobnyja na milicejskuju mihałku.