«Miłavica»: maski, padobnyja na čašački biusthaltaraŭ, — samyja biaśpiečnyja
Achoŭnyja maski dla tvaru ad «Miłavicy», jakija raptam źjavilisia ŭ prodažy ŭ pačatku tydnia, narabili šumu ŭ internecie. Jašče b: pa formie jany padobnyja na čašačku biusthaltara, a miakkija, pastelnyja tony, vybranyja dla masak, tolki dadajuć padabienstva! U sacsietkach žartujuć: «Možna kupić dźvie i paśla epidemii madyfikavać», zaznačaje Jeŭraradyjo.
U pres-słužbie «Miłavicy» raskazali Jeŭraradyjo, što było raspracavana 9 madelaŭ masak. Tyja, što padobny na čašački biusthaltaraŭ, na pradpryjemstvie ličać samymi biaśpiečnymi. Ale ich forma nijak nie źviazana z vyrabam spodniaj bializny:
«Śpiecyfičnaja forma, jakuju vy zhadvajecie, tolki ŭ adnoj maski, ale jana nijak nie źviazana ź biusthaltaram. Takija formy papraŭdzie ciapier šyjuć vielmi mnohija pradpryjemstvy. Forma źviazana vyklučna z formaj tvaru. Maska pavinna ščylna prylahać da tvaru i pry hetym nie cisnuć na nos i nie pieraškadžać dychańniu. Tamu samyja dobryja maski — hety jakraz tyja, jakija padobny na čašački biusthaltaraŭ».
Što da dziorzkich asacyjacyj, to na pradpryjemstvie ŭpeŭnienyja: kali b jany vyrablali inšyja aksiesuary abo adzieńnie — ludzi mieli b inšyja asacyjacyi ź ich maskami. «Kali b my šyli, naprykład, čepčyki dla novanarodžanych, uźnikła b asacyjacyja ź imi», — kažuć na «Miłavicy».
Dyzajn raspracoŭvali supracoŭniki pradpryjemstva, zychodziačy z taho, jakija materyjały jość na składzie i jakuju funkcyjanalnaść jany majuć: «Maska pavinna achoŭvać, jana pavinna doŭha nasicca, mycca, dezynfikavacca, kab u joj lohka było dychać. Materyjał masak — poliamid, spejsier i bavoŭna».
Vice-premjer Ihar Pietryšenka 5 krasavika zajaviŭ, što abjomy vytvorčaści achoŭnych masak u Biełarusi pavinny dasiahnuć dvuch miljonaŭ na sutki. Biełaruskija šviejnyja pradpryjemstvy častkova pieraprafilavalisia — i pačali šyć maski. Adzinych patrabavańniaŭ da ich niama, tamu ŭsie šyjuć ich na svoj ład — «sa svaim akcentam».
Svaimi bavaŭnianymi maskami ździviła biełarusaŭ jašče adna fabryka — «Śvitanak». Hetyja vyraby z vyhladu nahadvajuć elemient mužčynskaj spodniaj bializny, hetaki hulfik dla tvaru.