U Vjetnamie za 20 dzion nie vyjaŭlena novych vypadkaŭ zaražeńnia karanavirusam unutry krainy. Tam dziejničaŭ supieržorstki karancin
Nivodnaha novaha vypadku zaražeńnia karanavirusam nie vyjaŭlena za apošnija 20 dzion u Vjetnamie ŭnutry krainy. Pra heta paviedamiła ministerstva achovy zdaroŭja respubliki, piša TASS.
Pryčym kolkaść vypadkaŭ zaražeńnia karanavirusnaj infiekcyjaj ŭ Vjetnamie za ŭvieś čas zachavałasia na raniejšym uzroŭni — 271.
Ź ich 232 pacyjenty papravilisia i byli vypisanyja, jašče 39 inficyravanych znachodziacca na lačeńni ŭ miedustanovach centralnaha i pravincyjnaha uzroŭniaŭ. Za ŭvieś čas nichto nie pamior.
Za minułyja dva tydni ŭ krainie byli zafiksavanyja try zavoznyja vypadki zaražeńnia. U dvuch miascovych školnikaŭ, jakija viarnulisia ź Japonii, i ŭ brytanskaha ekśpierta ŭ naftahazavaj halinie, jaki prybyŭ siudy ŭ kamandziroŭku, test na karanavirus pakazaŭ stanoŭčy vynik. Inficyravanyja byli źmieščanyja na lačeńnie, stan usich traich aceńvajecca jak stabilny.
Vjetnam vielmi stroha pastaviŭsia da prablemy karanavirusa.
Pieršy vypadak zachvorvańnia na COVID-19 byŭ zafiksavany 23 studzienia. I ŭžo na nastupny dzień u stan pavyšanaj hatoŭnaści byŭ pieraviedzieny nacyjanalny supraćepidemičny centr. 29 studzienia byli sfarmiravany 40 śpiecyjalnych mabilnych bryhad dla dapamohi miascovym uładam i balnicam. Jany zajmalisia pieravozkaj chvorych, arhanizacyjaj karancinu, dezynfiekcyi pamiaškańniaŭ i h. d.
U lutym byli spynieny zaniatki va ŭsich navučalnych ustanovach krainy. Karancin dziejničaŭ da 27 krasavika.
U Vjetnamie adsočvańnie kantaktaŭ chvorych viałosia da čaćviortaha ŭzroŭniu.
Kožny, chto pryjazdžaŭ u krainu, prachodziŭ miedycynski kantrol i zapaŭniaŭ dekłaracyju zdaroŭja. Paźniej padobnyja pracedury byli zroblenyja pry ŭjeździe ŭ vialikija harady, asobnyja pravincyi, a taksama pry ŭvachodzie va ŭradavyja budynki, banki, špitali, bujnyja žyllovyja kompleksy.
Pry źjaŭleńni nośbitaŭ infiekcyi adbyvałasia łakalnaja izalacyja kvartałaŭ, viosak, nievialikich haradoŭ.
Z 1 krasavika ŭ krainie byŭ uviedzieny ahulnanacyjanalny dvuchtydniovy łakdaŭn. U vialikich haradach jaho praciahnuli da 22 krasavika.
Adnak i paśla zakančeńnia łakdaŭna zabaronienyja relihijnyja schody, spartovyja spabornictvy, fiestyvali, zastajucca začynienymi bary, sałony pryhažości i h. d. Abaviazkovym źjaŭlajecca našeńnie masak.
Urad vydatkavaŭ 2,7 młrd dalaraŭ na likvidacyju ekanamičnych nastupstvaŭ epidemii, a sama kraina vielmi chutka naładziła vytvorčaść testaŭ, srodkaŭ achovy. Vjetnam navat vysłaŭ humanitarnuju dapamohu maskami i kambiniezonami Japonii, ZŠA, krainam Zachodniaj Jeŭropy.