U Rečyckim rajonie DAI pieraśledavała aŭtamabil: za rulom akazaŭsia 15-hadovy rasijanin
Zdareńnie adbyłosia 12 červienia pryblizna a 6-j ranicy. U Rečycy na skryžavańni vulic Savieckaja i Čapajeva supracoŭniki DAI źviarnuli ŭvahu na aŭtamabil «Lanča», pasažyr i kiroŭca jakoha nie byli pryšpilenyja ramianiami biaśpieki, paviedamlaje aficyjny pradstaŭnik MUS Volha Čamadanava ŭ svaim telehram-kanale.
Kiroŭca praihnaravaŭ patrabavańni spynicca. Uklučyŭšy probliskavyja majački čyrvonaha i siniaha koleru, milicyjanty stali pieraśledvać mašynu.
Sychodziačy ad pahoni, kiroŭca «Lanča» nieadnarazova parušaŭ praviły darožnaha ruchu: nie vykonvaŭ sihnały śviatłaforaŭ, patrabavańni darožnych znakaŭ i raźmietki. Svaimi dziejańniami jon stvaraŭ realnuju pahrozu žyćciu i zdaroŭju inšych udzielnikaŭ darožnaha ruchu: chutkaść dasiahała 100 km/h.
Vyjechaŭšy na trasu «Rečyca — Horval — Vasilevičy», kiroŭca-uciakač pieraškadžaŭ abhonu. Inśpiektary DAI nieadnarazova papiaredžvali jaho pra vykarystańnie tabielnaj zbroi, adnak biezvynikova.
Paśla papieradžalnych strełaŭ u pavietra byli prycelnyja pa kołach: z prabitym zadnim kołam aŭto spyniłasia.
Vyśvietliłasia, što za rulom akazaŭsia 15-hadovy hramadzianin Rasii. Jon byŭ u svajakoŭ u Rečycy i biez dazvołu ŭziaŭ aŭtamabil. Pry hetym pravoŭ u jaho nie było, i być nie mahło. Pasažyram byŭ 17-hadovy navučeniec, jaki taksama znachodziŭsia ŭ haściach u rodnych.
Infarmacyja ab pravaparušeńni niepaŭnaletnim budzie nakiravana ŭ kamisiju pa spravach niepaŭnaletnich dla razhladu.