«Jon čuŭ padtrymku ludziej». Advakaty naviedali Viktara Babaryku ŭ SIZA KDB. Jon maje status padazravanaha
Fota Nadziei Bužan.
Pavodle advakata Dźmitryja Łajeŭskaha, abvinavačańni Babaryku nie pradjaŭlenyja, jon maje status padazravanaha. Artykuły, na jakich hruntujucca padazreńni, advakatam ahałošvać zabaranili, paviedamlaje Svaboda.
Advakaty Alaksandar Pylčanka i Dźmitry Łajeŭski naviedali Viktara Babaryku ŭ SIZA KDB.
«Jon badziory, čuŭ padtrymku ludziej. Jon aburany niezakonnaściu svajho zatrymańnia i adsutnaściu jakich-niebudź padstaŭ dla hetaha. Taksama jon aburany adsutnaściu prava na jurydyčnuju dapamohu, tamu što ad momantu zatrymańnia jon uvieś čas patrabavaŭ advakata», — skazaŭ Dźmitry Łajeŭski Svabodzie.
Jon źviarnuŭ uvahu na toje, što nijakich śledčych dziejańniaŭ da źjaŭleńnia advakataŭ u Kamitecie dziaržbiaśpieki ź Viktaram Babarykam nie pravodziłasia.
«Tamu ŭčorašnija kamentary nakont mahčymych śledčych dziejańniaŭ biespadstaŭnyja. Viktar Dźmitryjevič pryncypova maje namier adstojvać svaju pravatu».
Pavodle Dźmitryja Łajeŭskaha, Eduard Babaryka taksama znachodzicca ŭ Śledčym izalatary KDB:
«U jaho jość advakaty. Nakolki ja razumieju, zaŭtra pavinny adbycca pracesualnyja dziejańni z udziełam abaroncaŭ Eduarda».
18 červienia zatrymali pretendenta na pasadu prezydenta Viktara Babaryku i jahonaha syna Eduarda Babaryku. Uviečary dziaržaŭnyja kanały pakazali nibyta dokazy jahonaj datyčnaści da vyvadu hrošaj za miažu ŭ «spravie «Biełhazprambanku»». Aficyjna kamitet dziaržaŭnaha kantrolu (KDK) zatrymaŭ Viktara Babaryku jak «arhanizatara supraćpraŭnaj dziejnaści», za «sprobu ŭpłyvu na śviedak i chavańnie dokazaŭ złačynstva».