Da nastaŭnika historyi sa Smarhoni, jakoha zvolnili paśla źniataha vučniem videa, pryjšli siłaviki
Da nastaŭnika historyi sa Smarhoni Andreja Piatroŭskaha, jaki pazbaviŭsia pracy ŭ miascovaj himnazii paśla ŭroka ŭ adzinaccacikłaśnikaŭ, dzie adzin z vučniaŭ źniaŭ videa, pryjšli siłaviki. Jon kaža, što pretenzii źviazanyja ź niejkim «raspalvańniem sacyjalnaj varožaści», piša Tut.by.
uosm.ucoz.ru
Andrej Piatroŭski kaža, što siłaviki da jaho dadomu pryjšli ŭviečary 18 sakavika. Byŭ praviedzieny ahlad, kanfiskavanyja stareńki noŭtbuk, płanšet, fłeški i jaho smartfon. Usio adbyvałasia z sankcyi prakurora. Pretenzii da nastaŭnika, jak jamu rastłumačyli, źviazanyja z «raspalvańniem sacyjalnaj varožaści».
Pastanovy ab zaviadzieńni kryminalnaj spravy nastaŭnik nie bačyŭ. Zychodziačy z pastanovy ab ahladzie ciapier pravodzicca pravierka.
Nahadajem, 46-hadovy nastaŭnik sa Smarhoni Andrej Piatroŭski pazbaviŭsia pracy paśla taho, jak adzin ź jaho ŭrokaŭ na videa źniaŭ vučań. Tady nastaŭnik raspaviadaŭ pra ADKB. Piatroŭskaha abvinavačvali ŭ tym, što siarod inšaha nastaŭnik nibyta pakazvaŭ dzieciam videa, dzie byli kadry z telehram-kanała, jaki nielha nazyvać. Sam ža Andrej Francavič raspaviadaŭ, što materyjały dla ŭrokaŭ braŭ u adkrytym dostupie ŭ sietcy, a dzieciam zaŭsiody davaŭ tolki pravieranuju infarmacyju.