«Uziała aktyŭny ŭdzieł u niesankcyjanavanym kulturna-masavym mierapryjemstvie». Žančynie dali 10 sutak za pieśniu «Mury» ŭ pierachodzie
16 maja kala 19:00 zatrymali 41-hadovuju Alenu Haŭryłavu ŭ pierachodzie kala Kamaroŭskaha rynku. Supracoŭniki milicyi rascanili śpieŭ pieśni «Mury» jak niesankcyjanavanaje kulturna-vidoviščnaje masavaje mierapryjemstva, za jakoje na žančynu skłali pratakoł pa art. 24.23 KaAP, pišuć pravaabaroncy.
18 maja ŭ sudzie Savieckaha rajona sudździa Siarhiej Šaciła razhladzieŭ spravu Aleny Haŭryłavaj.
Jana patłumačyła, što ŭ toj dzień śpiavała roznyja pieśni, siarod jakich była i pieśnia «Mury» — mienavita jana stała pryčynaj zatrymańnia. Tamu sudździa Šaciła vyrašyŭ pacikavicca, što jana aznačaje. Alena adkazała, što hetaja pieśnia pra «katałonskaha muzyku: jon śpiavaŭ, a ludzi paŭtarali jaho pieśni». Ale śviedka-milicyjant nie pahadziŭsia i zajaviŭ, što pieśnia nosić palityčny charaktar.
Sudździa taksama cikaviŭsia, ci spynialisia kala žančyny ludzi, ale Alena adkazała admoŭna. U vyniku, sudździa Šaciła paličyŭ vinu Haŭryłavaj całkam dakazanaj, a śpieŭ pieśni «Mury» — niesankcyjanavanym kulturnym mierapryjemstvam.
Vynik — 10 sutak.