Prakuror prosić dla błohierki Volhi Takarčuk 1,5 hoda kałonii
17 śniežnia ŭ Zavodskim sudzie Minska adbylisia sprečki bakoŭ u pracesie nad 36-hadovaj błohierkaj Volhaj Takarčuk. Jaje vinavaciać pavodle troch artykułaŭ. Prakuror prosić dla błohierki 1,5 hoda kałonii ahulnaha režymu, paviedamlaje «Svaboda». Prysud ahučać 20 śniežnia.
Błohierku zatrymali sioleta 19 traŭnia.
Volhu Takarčuk vinavaciać pavodle troch artykułaŭ:
- «aktyŭny ŭdzieł u dziejańniach, jakija hruba parušajuć hramadski paradak» (č. 1 art. 342 Kryminalnaha kodeksa Biełarusi);
- «paklop» (artykuł 188 KK);
- «abraza sudździ» (č. 1 art. 391 KK).
Pavodle Śledčaha kamiteta, Takarčuk brała ŭdzieł u pratestnych maršach u Minsku 30 žniŭnia, 20 vieraśnia i 1 listapada 2020 hoda. Jana nibyta «znachodziłasia ŭ pieršych šerahach», «błakavała ruch transpartu», «vykrykvała łozunhi».
Błohierku vinavaciać taksama ŭ tym, što 14 studzienia 2021 hoda jana apublikavała na Youtube videa, jakoje «nie adpaviadaje rečaisnaści» i «hańbić sacyjalnaha piedahoha adnoj z himnazij Bresckaj vobłaści».
Taksama Volzie zakidajuć videarolik nibyta z «abrazami sudździ Pieršamajskaha rajona Minska» i «nienarmatyŭnaj leksikaj».
U śniežni 2020 hoda Volhu Takarčuk aštrafavali na 810 rubloŭ za ŭdzieł u mitynhu. Hetym faktam jana i aburałasia ŭ svaim videa. Raniej jaje taksama sudzili pa administracyjnych spravach za ŭdzieł u mitynhach.
Prysud Volzie Takarčuk ahučać 20 śniežnia.
Volha Takarčuk — błohierka, dyzajnierka, maci dvaich małych dziaciej (3 i 7 hadoŭ).