Siońnia za kraty za ŭčarašnija antyvajennyja pratesty adpravili jak minimum 55 čałaviek
Biełaruskija sudździ pačali razhladać administracyjnyja spravy suprać zatrymanych 27 lutaha. U asnoŭny dzień hałasavańnia na refierendumie pa źmienach u Kanstytucyi biełarusy vyjšli na pratesty suprać refierendumu, a taksama suprać udziełu Biełarusi ŭ rasijskim napadzie na Ukrainu.
U RUUSach na pratestoŭcaŭ składali pratakoły pa art. 24.23 KaAP (Udzieł u masavych mierapryjemstvach), art. 19.1 KaAP (Drobnaje chulihanstva) abo art. 24.3 KaAP (Niepadparadkavańnie milicyjantam). Niekatorych asudzili adrazu pa dvuch pratakołach.
Pa źviestkach pravaabaroncaŭ, ahułam było zatrymana bolš za 730 čałaviek. U vyniku 28 lutaha biełaruskija sudy aryštavali jak minimum 55 čałaviek, jašče trom pryznačyli štrafy. Davali ad 10 da 30 sutak, najbolš raspaŭsiudžanaje pakarańnie — 15 sutak.
Padrabiaźniej pra prysudy možna daviedacca na sajcie pravaabarončaha centra «Viasna», infarmacyja abnaŭlajecca.