Pamior pieršy ŭ śviecie pacyjent, jakomu amierykanskija chirurhi pierasadzili hienietyčna madyfikavanaje serca śvińni
57-hadovy Devid Bieniet zmoh pražyć dva miesiacy paśla ekśpierymientalnaj apieracyi, jakaja stała vynikam šmathadovych daśledavańniaŭ navukoŭcaŭ i mahła stać rašeńniem krytyčnaha niedachopu donarskich orhanaŭ va ŭsim śviecie, piša Bi-bi-si.
Bartli Hryfit z Devidam Bienietam u studzieni 2022 hoda.
Apieracyja prajšła 7 studzienia i pieršapačatkova novaje serca funkcyjanavała, adnak stan Bienieta pačaŭ paharšacca niekalki dzion tamu. Jon pamior 8 sakavika, paćvierdzili lekary miedycynskaha centra pry Univiersitecie štata Merylend.
U Bienieta było śmiarotnaje sardečna-sudzinnaje zachvorvańnie, i ŭdzieł u miedycynskim ekśpierymiencie byŭ jaho adzinym šancam na vyžyvańnie. Pierad apieracyjaj Devid paćviardžaŭ, što ŭśviedamlaje, nakolki ryzykoŭnaja ekśpierymientalnaja pierasadka serca śvińni.
«Jon prajaviŭ siabie jak śmieły i vysakarodny pacyjent, jon zmahaŭsia da samaha kanca», — adznačyŭ u zajavie balnicy chirurh Bartli Hryfit, jaki pravioŭ apieracyju.
Syn pacyjenta, Devid Bieniet-małodšy, vykazaŭ padziaku «za kožny inavacyjny momant, kožnuju varjackuju maru, kožnuju biassonnuju noč, jakija stali častkaj hetaha histaryčnaha pačynańnia». Ale, jak jon adznačyŭ, jon spadziavaŭsia, što transpłantat stanie «pačatkam nadziei, a nie jaje kancom».