«Atrymać dypłom jana nie paśpieła». Byłuju alimpijadnicu pa biełaruskaj movie aryštavali na 13 sutak
Pra Palinu Šynkievič, pra zatrymańnie jakoj stała ŭčora viadoma, raskazała adna ź jaje siabrovak. Jany bačylisia niezadoŭha da zatrymańnia.
Fota: sacyjalnyja sietki
«Palina ŭ toj dzień raskazvała, što niekudy treba iści na raźmierkavańnie i što dazvolili tolki ŭ dziaržaŭnyja struktury. Joj prapanavali niekalki miescaŭ, jana vybirała. Vyznačyłasia ci nie — nie viedaju», — dzielicca dziaŭčyna.
Nakolki viadoma, Palinu zatrymali jašče a 9-j ranicy 31 maja. Dziaŭčynie dali 13 sutak. Bolš padrabiaznaściaŭ blizkija nie paviedamlajuć. Siabry kažuć, što 31 maja viečaram akaunt u mesendžary studentki čamuści byŭ anłajn.
Palina vučyłasia na jurfaku BDU, śpiecyjalizavałasia na kryminalnym pravie.
«U škole ŭ jaje lepš išli humanitarnyja navuki, joj padabałasia hramadaznaŭstva. I pa vynikach CT samy lepšy bał byŭ pa im.
Siabravać my pačali ŭ siaredniaj škole. Palina pierajšła na biełaruskuju ŭ 8 ci 9 kłasie. Ale jana moža pierajści na ruskuju, kali jość pahroza kanfliktu. Čamu pačała razmaŭlać pa-biełarusku? Prosta patryjatyzm. Niejkich asablivych pryčyn nie było.
Palina, napeŭna, samaja aktyŭnaja z maich siabroŭ. Zaŭsiody paśpiavała vielmi šmat: i pracavała, i vučyłasia. Darečy, pracu zaŭsiody šukała pa śpiecyjalnaści. Sama vučoba va ŭniviersitecie joj padabałasia, nakolki ja viedaju. Jana vielmi starannaja, usio rabiła sama, udzielničała ŭ navukovych kanfierencyjach».
Atrymać dypłom Palina nie paśpieła. Abarona pavinna była być u dziasiatych čysłach hetaha miesiaca.