U Minsku pradajecca kvatera za 10 000$ za «kvadrat». Jak jana vyhladaje?
Telehram-kanał «Budni ryjełtara» źviarnuŭ uvahu na abjavu ab prodažy kvatery ŭ Rakaŭskim pradmieści ŭ Minsku. Cana — 1,18 miljony rubloŭ abo 478 tysiač dalaraŭ za płošču 47,8 kvadratnych mietraŭ. To-bok adzin «kvadrat» kaštuje 10 tysiač dalaraŭ. Što tam za kvatera?
Abjava ab prodažy apartamientaŭ raźmieščana na sajcie realt.by. Heta dvuchpakajoŭka ŭ krokavym dostupie da mietro Niamiha i Kupałaŭskaja — znachodzicca na vuł. Vyzvaleńnia.
Dvuchpaviarchovy cahlany dom pabudavany ŭ 1917 hodzie. Kvatera na prodaž znachodzicca na druhim paviersie, bałkona ŭ joj niama.
Ramont — zvyčajny, na padłozie łaminat, sanvuzieł raździelny. Kvatera pradajecca z meblaj i technikaj, hatovaja dla pražyvańnia.
Voś jak apisvaje apartamienty pradaviec:
«Kvatera źjaŭlajecca ekskluziŭnaj u svaim rodzie, u joj adsutničajuć pramyja vuhły, a vyšynia stolaŭ składaje 3 mietry. Dom źjaŭlajecca pomnikam historyka-kulturnaj spadčyny (…). U domie znachodziacca tolki 4 kvatery (usie na druhim paviersie), źvierchu paddachavaje pamiaškańnie, źnizu aŭtaškoła i stamatałahičny kabiniet».
Taksama ŭ abjavie paznačana, što, znachodziačysia ŭ domie ci ŭ jaho dvary, u čałavieka niama adčuvańnia, što jon u sercy Minska: adsutničaje šum praśpiekta, ludziej i mašyn.
Pobač jość kramy, banki, apteki, škoła, dziciačy sad, handlovyja centry, kafe, restarany, teatry, parki i nabiarežnaja raki Śvisłač.