Łukašenkaŭskija siłaviki pačali kampaniju pieraśledu za intervju niezaležnym ŚMI
Na sajcie Śledčaha kamiteta źjaviŭsia materyjał, u jakim raskazvajecca adrazu pra try vypadki zaviadzieńnia kryminalnych spraŭ za «sadziejničańnie ekstremisckaj dziejnaści». Pad hetaj farmuloŭkaj jany, jak vyhladaje, razumiejuć kantakty ź niezaležnymi ŚMI, jakija ledź nie pahałoŭna ciapier pryznanyja «ekstremisckimi» ŭ roznaj stupieni.
Fota ilustracyjnaje
Paviedamlajuć, što ŭ Dziatłaŭskim rajonnym adździele SK zaviali kryminalnuju spravu ŭ dačynieńni da 41-hadovaha ŭradženca Homiela. Nibyta mužčyna «ŭ krasaviku minułaha hoda daŭ intervju internet-resursu, pryznanamu ekstremisckim». Spravu zaviali, ale samoha mužčynu pakul što nie znajšli.
Taksama Hrodzienski mižrajonny adździeł SK zavioŭ kryminalnuju spravu ŭ dačynieńni da 21-hadovaj žycharki Hrodna.
Jašče adnoj paciarpiełaj ad dziejańniaŭ siłavikoŭ stała 29-hadovaja žycharka Pružanskaha rajona. Jana nibyta «dvojčy dała intervju internet-resursam, pryznanym ekstremisckimi farmavańniami». Zelvienskim rajonnym adździełam Śledčaha kamiteta joj pradjaŭlenaje abvinavačvańnie pa č. 1 i č. 2 art. 361-4 (sadziejničańnie ekstremisckaj dziejnaści, u t. ł. ździejśnienaje paŭtorna) Kryminalnaha kodeksa Respubliki Biełaruś, žančyna aryštavanaja. Praŭda, dadatkova joj stavicca ŭ vinu administravańnie adnaho z telehram-kanałaŭ.
Hetaja žančyna paśla 2020 hoda vyjechała za miažu, ale na pačatku hetaha hoda čamuści vyrašyła viarnucca.