Pamiežny kamitet pryznaŭ, što ŭ adnym z vypadkaŭ biełaruski pamiežnik pierasiek litoŭskuju miažu
Dziaržaŭny pamiežny kamitet prakamientavaŭ pretenzii litoŭskaha boku ab parušeńni biełaruskim pamiežnikam miažy. Adzin vypadak DPK pryznaŭ, druhi — nie.
DPK abvierhnuŭ pretenzii litoŭskaha boku nakont incydentu, što zdaryŭsia 18 krasavika.
«Z ulikam apublikavanaha litoŭskim bokam 18 krasavika videa ź nibyta zachodam vajennasłužačaha biełaruskaha pamiežnaha narada na terytoryju Litvy, paviedamlajem, što na hetym učastku prachodžańnie dziaržaŭnaj miažy maje peŭnyja asablivaści. U suviazi z hetym vyjava z kamier nazirańnia skažaje sapraŭdnaje miescaznachodžańnie biełaruskaha vajskoŭca», — havorycca ŭ paviedamleńni viedamstva.
Tamu, na dumku Dziaržpahrankamiteta, zajavy litoŭcaŭ, što biełaruski pahraničnik pierasiek miažu i na dva mietry pahłybiŭsia na terytoryju Litvy, nie adpaviadajuć rečaisnaści.
A voś incydent, što adbyŭsia 12 krasavika, DPK pryznaŭ.
«U chodzie rasśledavańnia ŭstanoŭlena, što 12 krasavika biełaruskim vajskoŭcam byŭ dapuščany nienaŭmysny zachod na terytoryju Litoŭskaj Respubliki na hłybiniu da 1 mietra. Ab vynikach hetaha rasśledavańnia byŭ prainfarmavany litoŭski bok, adnak zvarotnaj suviazi i zapytaŭ ab pradastaŭleńni dadatkovaj infarmacyi ad sumiežnaha boku da ciapierašniaha času nie atrymana», — zajavili ŭ DPK.
Tam adznačyli, što ŭ pačatku krasavika biełaruskim bokam zafiksavany zachod na terytoryju Biełaruś łodki ź nieviadomaj asobaj z terytoryi Litvy. U metach vyśviatleńnia abstavinaŭ biełaruski bok nakiravaŭ adpaviedny zapyt da Litoŭskaj Respubliki biez publičnaha abviaščeńnia hetaj infarmacyi.
U DPK ličać, što zajavy litoŭskaha boku — heta žadańnie stvaryć čarhovuju nahodu ŭ infarmacyjnym poli, dyskredytavać biełaruski bok i abvastryć situacyju na miažy na luboj padstavie. DPK, u svaju čarhu, zaklikaje źviarnuć uvahu na mihrantaŭ na miažy.