Stołtenbierha mohuć paprasić zastacca ŭ NATA jašče na hod
Hienieralnaha sakratara NATA, narviežca Jensa Stołtenbierha, jak čakajecca, paprosiać zastacca na pasadzie hienieralnaha sakratara NATA jašče na hod, paviedamlajuć ahienctvy Bloomberg i Reuters sa spasyłkaj na krynicy, znajomyja z chodam pieramoŭ.
Fota: Andreea Alexandru / AP Photo
Jens Stołtenbierh zajmaje hetu pasadu z 2014 hoda, i jahony druhi termin na pasadzie pavinien byŭ skončycca ŭ vieraśni 2022-ha hoda, ale byŭ pradoŭžany na hod praz vajnu Rasii suprać Ukrainy.
Sam Stołtenbierh zajaŭlaŭ, što nie maje namieru vyłučać svaju kandydaturu na novy termin, ale krynica Reuters adznačaje, što Stołtenbierh karystajecca ŭ NATA šyrokaj padtrymkaj i zastajecca efiektyŭnym lidaram.
«Administracyja [prezidenta ZŠA] prychodzić da dumki ab tym, što Stołtenbierh zastajecca jašče na hod, — skazaŭ ahienctvu amierykanski čynoŭnik, jaki paprasiŭ ab ananimnaści. — Nie padobna da taho, što ciapier u Aljansie jość kansensus z nahody jaho zamieny».
Imaviernaść taho, što Stołtenbierha paprosiać zastacca na pasadzie, uzrastaje pa miery nabližeńnia samitu NATA, jaki projdzie ŭ Vilni 11—12 lipienia, piša Reuters. Sajuźniki aścierahajucca razładu ŭ Aljansie ŭ pytańni adnosna vajny va Ukrainie.
Chto b ni zaniaŭ pasadu hienieralnaha sakratara NATA ŭ najbližejšy čas, jamu treba budzie, z adnaho boku, padtrymlivać adzinstva krain — čalcoŭ Aljansu ŭ padtrymcy Ukrainy, a z druhoha — nie dapuścić eskałacyi, jakaja pryviała b da niepasrednaha ŭstupleńnia NATA ŭ vajnu z Rasijaj.
Čytajcie taksama:
Stołtenbierh pra raźmiaščeńnie jadziernaj zbroi ŭ Biełarusi: NATA bačyć padrychtoŭku