Vybuch na bulvary Šaŭčenki ŭ Minsku 17 śniežnia 2022-ha byŭ hrupavym suicydam — SK
Tady zahinuła šeść čałaviek. Ciapier śledčyja śćviardžajuć, što vybuch naŭmysna vyklikała dvoje žylcoŭ hetaha doma, jakija raźlili ŭ kvatery kala 10 litraŭ vadkaści, a paśla paškodzili hazavuju trubu i vyklikali vybuch.
Skrynšot ź videa
Pažar u domie na bulvary Šaŭčenki ŭ Minsku adbyŭsia kala treciaj hadziny nočy 17 śniežnia minułaha hoda. Padčas jaho zahinuła šeść čałaviek, u tym liku 11-hadovaje dzicia. Try čałavieki ŭ ciažkim stanie byli špitalizavanyja.
MNS tady paviedamlała, što pryčynaj pažaru moh stać vybuch paroŭ lohkaŭzharalnaj vadkaści. Pra heta śviedčyli znojdzienyja ŭ adnoj z kvater jomistaści, u jakich zachoŭvałasia hetaja vadkaść.
Skrynšot ź videa
Ciapier śledčyja śćviardžajuć, što vybuch naŭmysna vyklikała dvoje žylcoŭ hetaha doma, jakija raźlili ŭ kvatery kala 10 litraŭ vadkaści, a paśla paškodzili hazavuju trubu i vyklikali vybuch. U vyniku zahinuli jak sami, dyk i jašče adna siamja z taho samaha padjezda. Paciarpieli taksama inšyja vypadkovyja ludzi.
Kryminalnaja sprava pa hetym fakcie ciapier spynienaja dziela taho, što mužčyna i žančyna, jakija takim čynam sprabavali ŭčynić «hrupavy suicyd», zahinuli padčas vybuchu.
Niadaŭna paviedamlałasia, što padobnym čynam imknuŭsia skončyć žyćcio samahubstvam ciažkachvory piensijanier z Dobrušskaha rajona na Homielščynie. U jahonym vypadku, praŭda, ludskich achviar nie było, zastaŭsia žyvym navat jon sam. U toj ža čas dom zaraz musić pajści pad znos.
Čytajcie taksama:
Pjany biaspraŭnik za śmiarotnaje DTZ na praśpiekcie Puškina atrymaŭ 8 hadoŭ kałonii