Chto stanie na čale Ukrainy, kali Zialenski zahinie?
Kali Uładzimira Zialenskaha spytali, ci turbuje sproba Rasii zabić jaho, jon adkazaŭ, što nie moža sabie hetaha dazvolić.
Uładzimir Zialenski z vajskoŭcami. Levaruč ad jaho hienierał Alaksandr Syrski — kamandujučy Uschodniaj hrupoŭkaj vojskaŭ, jakaja viadzie bai na samych haračych učastkach frontu. Fota: Metin Aktaş / Anadolu Agency via Getty Images
«Kali b ja dumaŭ pra heta ŭvieś čas, ja b prosta zamknuŭsia ŭ sabie, staŭ by vielmi padobnym ciapier da Pucina, jaki nie pakidaje svajho bunkiera», — skazaŭ ukrainski lidar u intervju CNN u minułym miesiacy. «Viadoma, maje ciełaachoŭniki pavinny padumać, jak hetaha nie dapuścić, i heta ich zadača. Ja nie dumaju pra heta».
Farmalna, zhodna z Kanstytucyjaj, linija pierajemnaści jasnaja, piša Politico.
Kali prezident nie ŭ stanie vykonvać svaje abaviazki, staršynia Viarchoŭnaj Rady Ukrainy biare na siabie jahonyja abaviazki.
Rusłan Stefančuk. Fota: Andriy Zhyhaylo/Obozrevatel/Global Images Ukraine via Getty Images
Staršynioj Viarchoŭnaj Rady źjaŭlajecca Rusłan Stefančuk, siabra partyi Zialenskaha «Słuha naroda». Praŭda, jon nie maje asabliva vysokaha rejtynhu davieru ŭ apytańniach hramadskaj dumki. Heta kala 40 adsotkaŭ, mienš za pałovu hałasoŭ Zialenskaha. I jon nie karystajecca papularnaściu ŭ apazicyjnych zakanadaŭcaŭ.
«Ale ja nie dumaju, što heta maje značeńnie», — skazaŭ Adryjan Karatnicki, staršy navukovy supracoŭnik Jeŭrazijskaha centra Atłantyčnaj rady.
«Tam mocnaja kirujučaja kamanda, i ja dumaju, što my ŭbačyli b kalektyŭny ŭrad», — dadaŭ jon.
Kirujučaja rada, chutčej za ŭsio, budzie składacca sa Stefančuka ŭ jakaści naminalnaha kiraŭnika, a taksama Andreja Jermaka, byłoha kinapradziusara i jurysta, jaki ŭznačalvaje Ofis prezidenta, ministra zamiežnych spraŭ Dźmitryja Kuleby i ministra abarony Alaksieja Reźnikava. Valeryj Załužny zastaniecca najvyšejšym hienierałam krainy.
Karatnicki skazaŭ, što jon spadziavaŭsia b ubačyć rolu televiadučaha Siarhieja Prytuły, jaki ciapier kiruje bujnymi dabračynnymi inicyjatyvami i maje zavobłačna vysoki rejtynh hramadskaha davieru.
«Kraina dasiahnuła punkta vielmi istotnaj salidarnaści i nacyjanalnaha adzinstva, tamu, kali b ź Zialenskim zdaryłasia niešta žudasnaje, heta nie było b takim vyrašalnym, jak vy mahli b padumać», — skazaŭ Karatnicki.
Jon adznačyŭ, što Ukraina stvaryła «dobra vyvastranuju» administracyjnuju, vajskovuju i dypłamatyčnuju mašynu.
«Ja nie chaču skazać, što Zialenski naŭrad ci maje da hetaha dačynieńnie», — dadaŭ jon. — Ale ja dumaju, što adzinstva krainy — heta niezamiennaja reč».