Rasijanie buduć abmiarkoŭvać ź biełarusami zabaronu pastavak kuraciny. Kažuć, što ich nie papiaredzili
Raśsielhasnahlad abmiarkuje z Departamientam vieterynarnaha i charčovaha nahladu Ministerstva sielskaj haspadarki i charčavańnia Biełarusi zabaronu pastavak biełaruskaha miasa ptuški na źniešnija rynki. Pra heta paviedamlaje pres-słužba Raśsielhasnahladu.
Cyrkularny list Departamienta vieterynarnaha i charčovaha nahladu Ministerstva sielskaj haspadarki i charčavańnia Biełarusi. Fota: fsvps.gov.ru
«Siarod dziełavoj supolnaści i ŭ ŚMI raspaŭsiudžvajecca infarmacyja ab uviedzienych Biełaruśsiu abmiežavańniach na ekspart na źniešnija rynki miasa ptuški. Rasijskaje viedamstva zapytała praviadzieńnie pieramoŭ z Departamientam vieterynarnaha i charčovaha nahladu Ministerstva sielskaj haspadarki i charčavańnia Respubliki Biełaruś», — adznačajecca ŭ paviedamleńni Raśsielhasnahladu.
Aficyjnaha paviedamleńnia ab zabaronie pastavak i jaho pryčynach ad biełaruskaha kampietentnaha orhana Raśsielhasnahlad, jak śćviardžajecca, nie atrymlivaŭ.
Kansultacyi majuć adbycca ŭ paniadziełak, 7 žniŭnia.
Raniej hazieta «Kommiersant» sa spasyłkaj na svaje krynicy paviedamiła, što Biełaruś z 1 žniŭnia abmiežavała vyvaz z krainy miasa ptuški, tłumačačy heta nieabchodnaściu nasycić popyt unutry krainy. Realnaj pryčynaj moža być uspyška ptušynaha hrypu na niekatorych ptuškafabrykach.
Pry hetym abmiežavańni nie raspaŭsiudžvajucca na ekspart u Kitaj i pradukcyju chołdynha «Siervaluks Ahra» (brend «Piatrucha»).
Čytajcie taksama:
Kolki kaštuje miasa ŭ Minsku. Vialiki ahlad cen z Kamaroŭki, hipiermarkietaŭ i internet-kram