«Łukašenka — jasnavidziec!» Što za sieryjał idzie na STB

Prapahanda sa skury lezie, kab pakazać Łukašenku blizkim da narodu. Dachodzić da absurdu.

Vokładka adnaho z vypuskaŭ pieradačy «Svoi». Skrynšot YouTube / CTVBY

Paŭhoda tamu na STB startavała prahrama «Svoi» — pra ludziej, jakija ŭ rozny čas sustrakalisia z Alaksandram Łukašenkam. Da hetaha času vyjšła 27 vypuskaŭ.

Kožny vypusk pačynajecca z charakternaha kadra: epizodu sustrečy Łukašenki z rabotnikami Minskaha zavoda kołavych ciahačoŭ u žniŭni 2020 hoda. Apracoŭka kadraŭ robić tvary ludziej u natoŭpie ciažkapaznavalnymi, pieratvarajučy ich u abstraktnuju masu. U centry — Łukašenka, jaki ŭzvyšajecca nad natoŭpam i, padobna Isusu, supakojvaje buru na mory.

Pastajanny elemient kožnaha vypusku — na pačatku stylizavany epizod sustrečy Łukašenki z rabotnikami MZKC u žniŭni 2020 hoda. Skrynšot YouTube / CTVBY

Zatym — šerah kadraŭ, jakija demanstrujuć harmoniju i adzinstva Łukašenki i prostych ludziej. Tut jon kosić travu, tam kročyć napieradzie maładych ludziej, paśla pakazvajuć, jak jon pieradaje dziciaci nievialikuju butelečku i žvava niešta tłumačyć, a potym — jak pa-panibracku paciskaje ruku sielaninu.

Usio heta padvodzić da kadra, dzie Łukašenka siadzić siarod viaskoŭcaŭ, u ich u rukach — hrabli i kosy, a na ekranie źjaŭlajecca nazva: «Svoi». Hetaja nazva rehularna pieratvarajecca ŭ «Svoj», dzie ptušačka nad «j» kałarystyčna imituje nieasaviecki ściah, jaki byŭ viernuty Łukašenkam u 1995 hodzie.

Vokładka adnaho z vypuskaŭ pieradačy «Svoi». Skrynšot YouTube / CTVBY

Prosty ahlad zahałoŭkaŭ dy adredahavanych cytat stvaraje źmiešanaje adčuvańnie: śmiechatvorna-dramatyčnaje. Z 27 vypuskaŭ, što vyjšli da hetaha času, vymaloŭvajecca patrojny vobraz Łukašenki: člen siamji i blizki siabar, nacyjanalny kumir i… zvyšnaturalnaja postać.

Pryviadziem samyja dziŭnyja zahałoŭki.

«Jeŭ z Łukašenkam sup z adnaho harška!»

«Łukašenka — jasnavidziec!»

«Łukašenka trymaŭ jaje dzicia na rukach»

«Dvojčy spračaŭsia z Łukašenkam!»

«Upaŭ na kaleni pierad Łukašenkam!»

«Jaho šašłyk acaniŭ Łukašenka»

«Łukašenka na kaleniach u šachcie»

Vokładka adnaho z vypuskaŭ pieradačy «Svoi». Skrynšot YouTube / CTVBY

Niekatoryja vypuski zakranajuć balučyja temy: pra žančynu, što pieražyła nacysckija złačynstvy, dziaciej ź ciažkimi chvarobami abo chłopčyka, jaki vyratavaŭ brata z pažaru i sam paciarpieŭ.

Zdavałasia b, takija temy nie pavinny vykarystoŭvacca ŭ prapahandysckich metach. Ale nie — stvareńnie kultu važniejšaje za ŭsio.

Prahrama «Svoi», vidavočna, jość sprobaj asprečyć ujaŭleńni pra izalavanaść i addalenaść Łukašenki ad naroda, pakazvajučy jaho ŭ prostych i zrazumiełych kantekstach. 

Kamientary da artykuła