Ad biełarusaŭ, jakija chočuć vučycca ŭ Polščy, nie buduć patrabavać vynikaŭ CT i CE
Pradstaŭnictva pa nacyjanalnym adradžeńni Abjadnanaha pierachodnaha kabinieta Biełarusi atrymała aficyjny adkaz z polskaha Ministerstva nacyjanalnaj adukacyi na zapyt adnosna pryznańnia adukacyi, atrymanaj u Biełarusi, dla pastupleńnia na navučańnie ŭ Polščy.
Varšaŭski ŭniviersitet. Zdymak ilustracyjny. Fota: eurostudy.info
«Ministerstva adukacyi i navuki Polščy zrabiła prapanovu ŭ prajekt zakona, jaki rychtuje MZS. Zhodna z hetym, Ministerstva adukacyi źmianiaje niekatoryja zakony, kab likvidavać parušeńni ŭ vizavaj sistemie i normu, jakaja dazvolić asobam ź Biełarusi pastupać na navučańnie ŭ Polščy pavodle pravił, jakija dziejničali da denansacyi Pahadnieńnia. Ad kandydataŭ na navučańnie ŭ Polščy nie buduć patrabavacca vyniki ekzamienaŭ CT i CE», — skazana ŭ liście.
Prablema ŭźnikła ŭ suviazi z adnabakovaj denansacyjaj Biełaruśsiu pahadnieńnia pamiž uradami Polščy i Biełarusi ab pryznańni ekvivalentnaści ŭ śfiery vyšejšaj adukacyi, roŭnaści navukovych stupieniaŭ i stupieniaŭ u halinie mastactva. Heta pryviało da źmieny ŭmoŭ pastupleńnia hramadzian Biełarusi na navučańnie ŭ Polščy z 3 listapada 2023 hoda, z-za čaho ciapier razam z zajavaj abituryjent pavinien padać u kuratoryum aśviety dakumient, jaki paćviardžaje zdaču ekzamienaŭ CT i CE z ulikam terminu ich dziejańnia — dla pryznańnia prava na pastupleńnie ŭ polskija VNU.
Novy zakon ustupić u siłu 1 lipienia 2025 hoda. Zajavy, padadzienyja ŭ kuratoryum aśviety i nie razhledžanyja da 30 červienia 2025 hoda, buduć razhladacca z ulikam hetych źmien.