Kiraŭnik Jeŭrarady: Jeŭrasajuz hatovy abaraniać terytaryjalnuju cełasnaść Danii

Jeŭrapiejski Sajuz całkam padtrymlivaje Daniju ŭ suviazi z pahrozami Donalda Trampa ab dałučeńni da ZŠA Hrenłandyi i hatovy abaraniać pryncypy nacyjanalnaha suvierenitetu i terytaryjalnaj cełasnaści. Pra heta ŭ intervju telekanału Euronews zajaviŭ kiraŭnik Jeŭrarady Antoniu Košta.

Horad Aasijat na zachadzie Hrenłandyi. Fota: freepik.com

U svaich razvahach jeŭračynoŭnik źviarnuŭ uvahu na pazicyju, jakuju ES zaniaŭ z pačatkam poŭnamaštabnaha ŭvarvańnia va Ukrainu.

«Mienavita hetyja fundamientalnyja pryncypy prymušajuć nas padtrymlivać Ukrainu. Mienavita jany prymušajuć nas asudžać parušeńni miežaŭ Demakratyčnaj Respubliki Konha. My nie pavinny spyniać abaraniać hetyja pryncypy, kali na kartu pastaŭlenaja terytaryjalnaja cełasnaść dziaržavy — člena Jeŭrapiejskaha Sajuza», — zajaviŭ Antoniu Košta.

«Terytaryjalnaja cełasnaść Danii, suvierenitet Danii, stabilnaść jaje miežaŭ, — dla nas, biezumoŭna, pytańnie pieršašarahovaj važnaści», — reziumavaŭ staršynia Jeŭrapiejskaj rady.

Z taho času, jak Donald Tramp admoviŭsia vyklučyć mahčymaść vykarystańnia ekanamičnaha prymusu i vajskovaj siły dla zachopu Hrenłandyi, Jeŭrasajuz znachodzicca ŭ napružańni, sprabujučy zrazumieć, nakolki realnaja hetaja pahroza.

Dniami prezident ZŠA padliŭ jašče aleju ŭ ahoń: «Ja dumaju, my damožamsia hetaha, — skazaŭ jon žurnalistam. — Ja sapraŭdy nie viedaju, jakija pretenzii maje Danija, ale było b vielmi niedružalubnym aktam, kali b jany nie dazvolili hetamu zdarycca, tamu što heta robicca dla abarony volnaha śvietu».

Paśla taho premjer-ministarka Danii Miete Frederyksien adrazu adpraviłasia ŭ mini-turne pa Jeŭropie. Jaje meta: atrymać padtrymku krain ES pierad biesprecedentnym vyklikam. Frederyksien zajaviła, što jana adkrytaja dla ŭmacavańnia vajskovaha supracoŭnictva sa Złučanymi Štatami, ale nastojvaje na tym, što paŭaŭtanomny vostraŭ, jaki ŭvachodzić u skład Dackaha karaleŭstva, nie pradajecca.

Novaje apytańnie zaśviedčyła, što 85% darosłych žycharoŭ Hrenłandyi vystupajuć suprać płanaŭ Trampa. Choć Hrenłandyja nie źjaŭlajecca členam ES, jana maje dostup da jaho fondaŭ, hrenłandcy karystajucca svabodaj pieramiaščeńnia ŭnutry supolnaści i ličacca hramadzianami Jeŭrasajuza.

Jeŭrakamisija paćvierdziła, što ŭ vypadku vajskovaj ahresii na Hrenłandyju budzie raspaŭsiudžvacca pałažeńnie ab uzajemnaj abaronie, praduhledžanaje damovami.

«Hrenłandyja źjaŭlajecca častkaj terytoryi Karaleŭstva Danija. Danija — suvierennaja dziaržava. Danija vyznačaje svaje intaresy, i Jeŭrapiejski sajuz budzie padtrymlivać jaje», — skazaŭ Antoniu Košta, nieadnarazova padkreśliŭšy nieabchodnaść vykanańnia mižnarodnaha prava.

«My nie źbirajemsia budavać zdahadki. My, naturalna, spadziajemsia, što hetaja sprečka nie pieraraście ŭ kanflikt, a kali kanflikt i ŭźniknie, to jana budzie raźviazanaja paluboŭna, jak i naležyć sajuźnikam», — padkreśliŭ jon.

Kamientary da artykuła