Danija pahadziłasia na abmierkavańnie Arktyki z Vašynhtonam, paviedamiŭ ministr zamiežnych spraŭ Danii Łars Lekie Rasmusen paśla svajoj pieršaj telefonnaj razmovy z novym dziaržsakratarom ZŠA Marka Rubia z administracyi Donalda Trampa, piša Radyjo Svaboda.
Tramp, jaki pačaŭ niadaŭna novy termin u Biełym domie, zajaŭlaŭ pra namier dałučyć Hrenłandyju, jakaja maje status samakiravanaj terytoryi ŭ składzie dackaha Karaleŭstva. Pry hetym Tramp nie staŭ vyklučać prymianieńnie srodkaŭ ekanamičnaha i vajennaha cisku.
U raspaŭsiudžanym u piatnicu paviedamleńni MZS Danii havorycca, što Rasmusen i Rubia praviali 20-chvilinnuju hutarku ŭ «dobrym i kanstruktyŭnym tonie», abmierkavaŭšy Ukrainu, jeŭrapiejskuju biaśpieku i situacyju na Blizkim Uschodzie, paviedamlaje Reuters.
«Arktyčnaja biaśpieka nie stajała na paradku dnia, ale było vyrašana, što abmierkavańnie pamiž Złučanymi Štatami, Danijaj i Hrenłandyjaj budzie mieć miesca paźniej, — zajavili ŭ dackim Ministerstvie.
Hazieta Financial Times u piatnicu sa spasyłkaj na jeŭrapiejskija krynicy paviedamiła, što razmova samoha Trampa z premjer-ministram Danii Miete Frederyksien, jakaja adbyłasia na minułym tydni, «prajšła vielmi drenna». Vydańnie spasyłajecca na piać ciapierašnich i byłych jeŭrapiejskich čynoŭnikaŭ, jakija byli prainfarmavanyja ab zvanku.
Sa słoŭ surazmoŭcaŭ vydańnia, Tramp u razmovie zaniaŭ ahresiŭnuju i kanfrantacyjnuju pazicyju paśla słoŭ kiraŭnika dackaha ŭrada ab tym, što Hrenłandyja nie pradajecca, pry tym što adnačasova Frederyksien prapanavała pašyreńnie supracoŭnictva ŭ pytańniach funkcyjanavańnia vajskovych baz i raspracoŭcy karysnych vykapniaŭ.
«Jon byŭ niepachisny. Heta było jak chałodny duš. Raniej było ciažka ŭsprymać heta surjozna. Ale ja dumaju, heta ŭsio surjozna, i patencyjna vielmi niebiaśpiečna», — adznačyła adna z krynic haziety.
U ofisie premjera Danii ŭ adkaz na publikacyju zajavili, što nie pryznajuć interpretacyju razmovy sa słoŭ ananimnych krynic.
Kamientary
Darečy, kali sam ty nie viedaješ, chto takija redneki - to čamu ty čakaješ, što Tramp pavinien viedać roźnicu pamiž Ukrainaj i Rasiejaj?