Łukašenka razdaŭ hienieralskija zvańni piaci vajskoŭcam. Voś što pra ich viadoma

Ihar Hutnik, Vadzim Ramaniŭ, Siarhiej Frałoŭ, Dźmitryj Bitny, Vital Šestak.

Ihar Hutnik. Skrynšot z telekanała STB

Samy viadomy ź ich — 50-hadovy Ihar Hutnik. Jon skončyŭ Vajennuju akademiju ŭ 1997 hodzie i ŭsio žyćcio pracavaŭ u pamiežnych vojskach.

U 2020-m jon pracavaŭ načalnikam Bresckaj pamiežnaj hrupy. Pa źviestkach resursa «Karniki Biełarusi», Hutnik zahadaŭ paścialić bieł-čyrvona-bieły ściah na ŭvachodzie ŭ pamiežny punkt.

Jaho ličać adnym z adkaznych za mihracyjny kryzis na miažy Biełarusi i Polščy. Za heta Jeŭrapiejski sajuz uvioŭ suprać Hutnika piersanalnyja sankcyi.

U 2023 hodzie Łukašenka daŭ jamu pavyšeńnie. Ciapier jon namieśnik staršyni Dziaržaŭnaha pamiežnaha kamiteta.

Vadzim Ramaniŭ. Skrynšot z telekanała STB

Vadzim Ramanivu 53 hady. Jon u 1992 hodzie skončyŭ Razanskuju vyšejšuju kamandnuju vučelniu. U 2007-m — Vajennuju akademiju Hienieralnaha štaba Rasii.

Pracavaŭ u vojskach suviazi. Ciapier uznačalvaje ŭpraŭleńnie suviazi Hienštaba Uzbrojenych siłaŭ Biełarusi.

Jon adznačyŭsia zajavaj pra toje, što ŭzbrojenyja siły Biełarusi raspracavali ŭłasny Starlink. Ramaniŭ abiacaŭ, što jon da kanca hodu budzie ŭ vojskach.

Siarhiej Frałoŭ. Fota z sajta Minabarony Biełarusi

Siarhieju Frałovu 49 hadoŭ. Jon rodam ź Vierchniadźvinska Viciebskaj vobłaści. U 1997 hodzie skončyŭ Vajennuju akademiju, a ŭ 2017 davučyŭsia jašče raz.

Z žniŭnia 2022 jon zajmaje pasadu pieršaha namieśnika Hienštaba, pieršaha namieśnika kiraŭnika VVS i vojskami SPA. Paśla taho, jak pieršyja šachiedy zalacieli ŭ Biełaruś, Frałoŭ zajaviŭ, što budzie pravodzicca rasśledvańnie.

Paśla hetaha jamu ŭ svajoj maniery zvaniŭ Andrej Pavuk. Hienierał skazaŭ jamu, što ničoha strašnaha, što bieśpiłotnik prylacieŭ u Biełaruś — maŭlaŭ, nikoha nie paškodziła, nu i dobra.

Dźmitryj Bitny. Fota: «Hazieta Słonimskaja»

Dźmitryju Bitnamu 49 hadoŭ. Jon naradziŭsia ŭ Słucku. U 1992 skončyŭ Suvoraŭskuju vučelniu, u 1996 — Minskuju vyšejšuju kamandnuju vučelniu, a ŭ 2001 — Vajennuju akademiju Biełarusi.

Ź lutaha 2023 jon namieśnik kiraŭnika Zachodniaha vajskovaha kamandavańnia. U miedyja ničym asablivym nie adznačyŭsia.

Vital Šestak. Fota sa staronki Ministerstva abarony Biełarusi

Vital Šestak kiruje štabam uzbrajeńnia Uzbrojenych siłaŭ Biełarusi. Raniej jon byŭ načalnikam upraŭleńnia rakietna-artyleryjskaha ŭzbrajeńnia. U miedyja nie adznačyŭsia zusim ničym.

Kamientary da artykuła