«Baču padabienstva Turčyna z Makiejem u łohicy pavodzinaŭ». Ekanamist Kruk pra novaha premjera

Čaho čakać ad Alaksandra Turčyna na pasadzie premjer-ministra? Ekanamist Dźmitryj Kruk u kamientary «Našaj Nivie» tłumačyć, čamu nie varta začaroŭvacca jaho vobrazam rynačnika. 

Alaksandr Turčyn

Nie refarmatar, a dyscyplinavany vykanaŭca

Ekanamist Dźmitryj Kruk ličyć, što Turčyn — čałaviek sistemy i «mocny haspadarnik». Bolšaść pazicyj, jakija jon zajmaŭ, chutčej, źviazanyja ź mieniedžmientam, z arhanizacyjnaj spravaj.

«Viedaje, ad kaho zaležyć toje ci inšaje rašeńnie, jak bałansavać. Heta takaja vielmi śpiecyfičnaja rysa, jakoj nie šmat čynoŭnikaŭ vałodaje», — kaža Dźmitryj Kruk. 

U śpisie pasadaŭ Turčyna ekanamist vyłučaje pazicyju kiraŭnika aparatu Savieta ministraŭ. Heta cieniavaja pasada, ale na joj, pa mierkavańni Kruka, znachodziacca schavanyja dyryžory.

«Nie tyja, chto zadajuć paradak dnia, ale tyja, chto viedajuć, jak toj ci inšy paradak dnia implemientavać u biahučych umovach, — kaža jon. — Toje, što ŭźlot Turčyna ad hetaj pasady pajšoŭ, mnie padajecca davoli charakternym i źmiastoŭnym faktaram». 

Isnuje mierkavańnie, što Turčyn — prarynkavy čałaviek i navat refarmist. Ekanamist kaža, što heta stereatyp, jaki skłaŭsia ŭ 2017 hodzie. Dla hetaha jość niekalki pryčyn. 

Pieršaja — Turčynu prypisvajuć datyčnaść i navat aŭtarstva dyrektyvy №7 ab raźvićci pradprymalnictva.

«Tut chacieŭ by padkreślić, što taja dyrektyva dla taho času była davoli źmiastoŭnaj i simvaličnaj, ale jana, chutčej, padkreślivała tuju rolu, jakuju ja ŭžo abmalavaŭ: Turčyn viedaje, jakimi instrumientami i jak skarystacca, jak pierakłaści ich na movu sistemy ŭ adpaviednaści z zadačami, jakija pastaŭleny dla biahučaha pieryjadu. Hetaja dyrektyva takuju rolu vykonvała, ale jana nie stała nasamreč mocnym i tryvałym padmurkam dla raźvićcia pryvatnaha siektaru», — kaža Kruk. 

Druhaja — Turčyn adnosna praciahły čas zajmaŭ pasadu staršyni Rady pa raźvićci pradprymalnictva, ale kardynalnych zruchaŭ tam nie było. 

«Jon byŭ davoli dyscyplinavanym vykanaŭcam i rabiŭ usio toje, što patrabavałasia na pasadzie. [Ale] faktu, što mienavita jon zadavaŭ niejkija viektary raźvićcia novych prahram, niama». 

Treciaja pryčyna, što paŭpłyvała na stereatyp, — Turčyn zajmaŭ pasadu pieršaha vice-premjera va ŭradzie Siarhieja Rumasa, jakoha časta atajasamlajuć z prarynkavaściu. Dźmitryj Kruk zaŭsiody spračaŭsia z hetym mierkavańniem.

«Urad Rumasa vykonvaŭ funkcyju zachavańnia rytoryki nibyta libieralizacyi, ale pavinien byŭ zapavolić tyja zruchi, jakija adbyvalisia ŭ pryvatnym siektary, nie dać skaračacca dziaržaŭnamu siektaru». 

U łohicy pavodzinaŭ Turčyn padobny da Makieja 

Na pasadzie kiraŭnika Minskaha abłvykankama Turčyn ruchaŭsia zhodna z «hienieralnaj linijaj». Heta skasavańnie roli pryvatnaha siektaru, pryviazki jaho da dziaržaŭnaha, staŭka na kiravańnie inviestycyjami bujnych dziaržaŭnych pradpryjemstvaŭ, pieraraźmierkavańnia dziaržaŭnych patokaŭ. 

«Tyja paru znajomych, chto ź im ščylna stasavaŭsia da 2020 hoda, kažuć, što ŭ asabistych razvažańniach jon byŭ bolš nastrojeny na padtrymańnie pryvatnaha siektaru. Ale heta faktyčna toje, što ja zaraz pryvioŭ: kali «hienieralnaja linija» źmianiałasia, heta nie viało da niejkich asabistych inicyjatyŭ».

Dźmitryj Kruk bačyć padabienstva łohiki pavodzin Turčyna z Uładzimiram Makiejem. 

«Makiej taksama demanstravaŭ peŭnyja parastki libieralizmu, ale hałoŭnym dla jaho zaŭždy była słužba sistemie. Jana pieravažyła ŭsie astatnija pačynańni. Mnie padajecca, heta vielmi padobnaja historyja da Turčyna, i łohika pryjarytetaŭ u jaho ŭ hetym sensie vielmi padobnaja», — padsumoŭvaje ekanamist. 

Kamientary da artykuła