«Razumny čałaviek, i heta maksimum». Što kažuć pra Alaksandra Turčyna, novaha premjera
«Ci možna jaho charaktaryzavać jak prahmatyka?» — zapytałasia «Naša Niva» ŭ biełaruskaha biznesoŭca, jaki naziraŭ za Turčynym z 2010-ch.
«Pierš za ŭsio luby čynoŭnik siońnia i ŭčora — heta kanfarmist, — skazaŭ «Našaj Nivie» pradprymalnik z kantaktami ŭ vyšejšych ešałonach ułady. — U cełym jon sam heta paćviardžaje pieršymi kamientarami. «Prahmatyk» hučyć zanadta dobra, — dadaŭ surazmoŭca.
— «Refarmist»?
— «Refarmist» nie adpaviadaje ciapierašniamu etapu. Refarmistam jon moh być u minułym, nie takim dalokim.
— «Dziaržaŭnik»?
— «Dziaržaŭnik» — heta ŭ cełym charaktarystyka pa zmoŭčańni ŭsich čynoŭnikaŭ, za redkim vyklučeńniem vidavočnych komiersaŭ va ŭładzie.
— «Rynačnik»?
— Heta dakładniej, čym refarmist. Darečy, «rynačnik» — heta stanoŭčaja rysa. Dla mianie jon rynačnik, ale kanfarmist. I, mahčyma, heta najlepšaje spałučeńnie, bo refarmistaŭ nam nie daduć. Daj boh, kab dali chacia b prosta razumnych ludziej», — kaža pradprymalnik.
Pryznačeńnie 49-hadovaha Alaksandra Turčyna moža śviedčyć jak pra čakańnie ekanamičnaha kryzisu ŭ Rasii, nastupstvy jakoha pierakinucca na Biełaruś, tak i pra namier Łukašenki źmiakčyć kurs paśla piaci hadoŭ zamarožvańnia i represij.
Samaje vidavočnaje, što Łukašenka vybraŭ u premjery čałavieka aktyŭnaha i inicyjatyŭnaha, jaki zdolny na pošuk novych rašeńniaŭ dla ekanomiki i jaki pry hetym łajalny ciapierašniamu prarasijskamu i represiŭnamu palityčnamu kursu.
Alaksandr Łukašenka, pryznačajučy premjer-ministram Alaksandra Turčyna, adznačyŭ jaho ŭładarnaść i rašučaść — «najaŭnaść prezidenckich schilnaściaŭ», jak nazvaŭ heta Łukašenka.
«Ja śpiecyjalna, vy zaŭvažyli, cełymi błokami pradstaviŭ našych vice-premjeraŭ i tych ministraŭ, jakija buduć ź imi pracavać. Ja chaču, kab vy zaŭsiody pamiatali — u vas jość takija prezidenckija schilnaści, jak u mianie. Vy možacie rezka paviarnuć. Ale tut vam daviadziecca raicca z Ramanam Alaksandravičam [Hałoŭčankam]», — skazaŭ Łukašenka.
Były kiraŭnik urada — 51-hadovy Raman Hałoŭčanka — zajmaŭ pasadu premjer-ministra Biełarusi z červienia 2020 hoda. 10 sakavika jon staŭ kiraŭnikom Nacbanka.
Alaksandru Turčynu 49 hod. Jon naradziŭsia ŭ Navahrudku. Skončyŭ Biełaruski dziaržaŭny ekanamičny ŭniviersitet, Akademiju kiravańnia.
U 2004—2010 hadach pracavaŭ u Karelickim rajvykankamie Hrodzienskaj vobłaści, z 2010 hoda — u Minskim abłvykankamie.
Z 2018 hoda pryznačany na pasadu pieršaha namieśnika premjer-ministra.
Z 2019 hoda — staršynia Minskaha abłvykankama.
Turčyn — nie samy małady premjer za čas prezidenctva Łukašenki. Michaiłu Čyhiru i Ramanu Hałoŭčanku na momant pryznačeńnia było pa 46 hadoŭ, Siarhieju Rumasu — 48, Siarhieju Sidorskamu — 49.
Pieršaj zajavaj Turčyna na novaj pasadzie stała toje, što «nijakaj istotnaj karekciroŭki ekanamičnaha kursu nie budzie».
Adkazvajučy na pytańnie, ci jość nieabchodnaść źmianiać padychody, jon skazaŭ: «Majo samaje lubimaje vykazvańnie — «evalucyja biez revalucyj». Na luboj pasadzie, viadoma, nieabchodna evalucyjanavać: i na pasadzie staršyni ŭrada, i staršyni Minskaha abłvykankama… Kožny kiraŭnik razam sa svaim prychodam prynosić niešta novaje, novy pohlad na tyja ci inšyja prablemy».
«Nijakaj istotnaj karekciroŭki ekanamičnaha kursu, viadoma, nie budzie. Samaje hałoŭnaje — zabiaśpiečyć ustojlivaje i zbałansavanaje raźvićcio našaj krainy», cytuje Turčyna dziaržaŭnaje ahienctva BiełTA.
Ciapier čytajuć
Dziaržaŭnyja sacyjołahi: Biełarusy najpierš źviazvajuć svaju dziaržaŭnaść ź Vialikim Kniastvam Litoŭskim14
Kamientary
Błahodaria papie načał diriektorom (ili zavmahom?) kołchoznoho mahazina, potom zamom priedsiedatiela na rodinie hłavy administracii Makieja, był pomoŝnikom Łukašienko, był rukovoditielem apparata Sovmina, t.ie. malčik na pobiehuškach.