Zapuścili płatformu dla virtualnych padarožžaŭ pa stračanaj architektury
U Biełarusi zapracavała Xraytours — płatforma, jakaja z dapamohaj 3D-madelavańnia i technałohij dapoŭnienaj realnaści (AR) adnaŭlaje stračanyja architekturnyja pomniki krainy. Karystalniki mohuć virtualna pieranieścisia da razburanych zamkaŭ, kaściołaŭ, sinahoh i cerkvaŭ, kab ubačyć ich u adnoŭlenym vyhladzie.
Skrynšot z sajta
Jak piša kamanda prajekta, płatforma nakiravanaja nie tolki na zachavańnie kulturnaj spadčyny, ale i na supraćstajańnie vyniščeńniu biełaruskaj identyčnaści.
Za stahodździ šmatlikija histaryčnyja abjekty byli razburanyja pad ciskam vajny, savieckaj palityki i kulturnaj asimilacyi. Xraytours viartaje hetyja pomniki da žyćcia, vykarystoŭvajučy archiŭnyja danyja i histaryčnyja materyjały dla dakładnaj rekanstrukcyi.
Pry hetym kožny achvotny moža naviedać sajt Xraytours, prateściravać płatformu i navat zrabić fota z adnoŭlenymi budynkami praz AR. Stvaralniki prajekta prosiać karystalnikaŭ pakidać zvarotnuju suviaź, kab udaskanalvać pradukt i pašyrać bazu dastupnych histaryčnych abjektaŭ.