U novym suśvietnym rejtynhu pašpartoŭ pieramahła Irłandyja, a Biełaruś na 125-m miescy
Kansałtynhavaja kampanija ŭ śfiery padatkaŭ i imihracyi Nomad Capitalist apublikavała svoj štohadovy rejtynh «samych mocnych pašpartoŭ». Jaho adroźnieńnie ad bolšaści padobnych daśledavańniaŭ u tym, što akramia mahčymaści biaźvizavaha ŭjezdu ŭ inšyja krainy, jon uličvaje šmat inšych važnych paramietraŭ, piša CNBC.
Dziaviataje vydańnie rejtynhu ŭklučaje 199 krain i terytoryj, pry jaho składańni vykarystoŭvalisia 20 krynic — ad materyjałaŭ padatkovych słužbaŭ da World Happiness Report i Indeksu čałaviečaha raźvićcia AAN.
U adroźnieńnie ad inšych rejtynhaŭ, što aceńvajuć pašparty tolki pa kolkaści krain ź biaźvizavym ujezdam, Nomad Capitalist uličvaje piać kryteryjaŭ:
- Biaźvizavy režym — 50%;
- Padatkaabkładańnie — 20%;
- Hłabalnaje ŭsprymańnie krainy ŭ śviecie — 10%;
- Mahčymaść atrymańnia dvajnoha hramadzianstva — 10%;
- Asabistyja svabody (svaboda presy, vajskovy abaviazak i h.d.) — 10%.
Hetyja faktary dapamahajuć lepš zrazumieć «sapraŭdnuju vartaść» hramadzianstva i vyznačyć, ludziam ź jakoj krainy, vałodajučy adpaviednym pašpartam, sapraŭdy žyviecca va ŭsich sensach kamfortna.
Zhodna z hetym rejtynham, samy mocny pašpart u śviecie maje Irłandyja.
Hetaja kraina ŭpieršyniu zaniała pieršaje miesca ŭ štohadovym rejtynhu ad Nomad Capitalist. Jašče ŭ 2020 hodzie jana padzialiła lidarstva ź Luksiemburham i Šviecyjaj.
«Irłandyja ździviła ŭsich svajoj mocnaj mižnarodnaj reputacyjaj, družalubnaj da biznesu padatkovaj palitykaj i hnutkaściu hramadzianstva», — skazaŭ daśledčyk kampanii Chaŭjer Karea dla CNBC Travel.
Nastupnyja miescy śledam za Irłandyjaj zajmajuć taksama jeŭrapiejskija krainy: Šviejcaryja, Hrecyja, Partuhalija, Čechija, Finlandyja, Luksiemburh, Niderłandy, Malta. I tolki dziasiatuju pazicyju dzielać pamiž saboj niejeŭrapiejskija dziaržavy — Abjadnanyja Arabskija Emiraty i Novaja Ziełandyja.
Biełaruś u śpisie znachodzicca na dalokim 125-m miescy, daloka adstajučy ad usich svaich susiedziaŭ. Łatvija tut na 19-m miescy, Litva — na 29-m, Polšča — na 32-m, Ukraina — na 73-m, a Rasija — na 95-m.
Zamykajuć suśvietny rejtynh takija krainy, jak Pakistan, Irak, Erytreja, Jemien i Afhanistan.