Biez Karatkieviča i Šahała. U viciebskim lalečnym teatry źnikli z afišy mnohija śpiektakli — u čym pryčyna?

U repiertuary viciebskaha teatra «Lalka» amal nie zastałosia śpiektaklaŭ dla darosłych. Raniej tut hrali i «Ładździu rospačy» pa Karatkieviču, i pastanoŭku pra Marka Šahała «Mastak. Viartańnie ŭ Viciebsk». Ciapier adzinaja prapanova ŭ afišy dla hledačoŭ 16+ —teatralna-kancertnaja prahrama «Kalejdaskop (nie)zvyčajnych historyj». U astatnim ža repiertuar składajuć takija kazki dla samych maleńkich, jak «Kałabok» ci «Piatruška» (apošni ŭvohule ličycca piersanažam ruskaha narodnaha lalečnaha teatra). Z čym źviazanyja takija pieramieny?

U administracyi teatra, kudy žurnalist «Našaj Nivy» dazvaniŭsia ŭ jakaści stałaha hledača, paviedamili, što afišnaje źbiadnieńnie źviazanaje sa zvalnieńniami akcioraŭ:

«Akciory pajšli, a maładniak navučyć jašče treba, uvieści ŭ repiertuar. U nas ža byli zaniatyja i ŭzrostavyja akciory: niechta pierajšoŭ na novuju pasadu, a inšym užo składana ŭ svaje 60+ skakać u «Bremienskich muzykach» hetak ža, jak raniej».

Hod tamu z teatra byŭ zvolnieny kolišni mastacki kiraŭnik Viktar Klimčuk, jaki pracavaŭ tam z momantu stvareńnia «Lalki». Mienavita ź jaho asobaj i źviazvajuć najbolš praryŭnyja i cikavyja pastanoŭki ŭ repiertuary. Padčas jaho pracy kalektyŭ teatra byŭ nieadnarazova adznačany dypłomami na prestyžnych mižnarodnych fiestyvalach. Pry hetym zvolnili Klimčuka nibyta za nievykanańnie płanaŭ, za jakija zvyčajna adkazvaje dyrektar, a nie mastacki kiraŭnik.

Afiša teatra na krasavik. Možna pabačyć, što dadatkova teatr daje placoŭku inšym vystupoŭcam: tak, u pačatku miesiaca na scenie zaśviaciłasia šou psichałahičnych iluzij ad fokuśnikaŭ Aleha Bułavina i Alaksandra Šyšuka. Taksama tut vystupaje viciebski pryvatny vyjazny teatr «UchTyška», jaki robić pastanoŭki na ruskaj movie. Fota: lialka.by.

Toje, što ŭłasnaja repiertuarnaja raznastajnaść pamienšała, u administracyi źviazvajuć i z hrašovymi składanaściami, vyklikanymi novym ukazam Łukašenki, jaki nabyŭ moc z pačatku hetaha hoda. Zhodna ź im teatry stali atrymlivać mienš biudžetnych hrošaj — ich pieraviali na roŭnadolevaje finansavańnie raschodaŭ. Ciapier stvareńnie novych pastanovak, hastroli, apłata kamunalnych pasłuh i ekspłuatacyjnych vydatkaŭ, a taksama vypłata zarobkaŭ ažyćciaŭlajecca 50 na 50 — sa srodkaŭ biudžetu i ŭłasnych prybytkaŭ teatraŭ.

«Nam treba bolš zarablać, tamu zastajecca mienš času na repietycyi čahości novaha, musim bolš vystupać», — patłumačyli ŭ administracyi viciebskaha teatra «Lalka».

U suviazi z hetym navinak u teatry ci adnaŭleńnia staroha repiertuaru bližejšym časam nie pradbačycca.

«My bolš ničoha nie paciahniem. Mabyć, praź niejki čas. I staryja pastanoŭki my nie śpisvajem, mahčyma, jany taksama niedzie niejkim čynam ažyvuć».

Kadr z pastanoŭki «Kalejdaskop (nie)zvyčajnych historyj». Fota: lialka.by

Pakul u teatry zaklikajuć hledačoŭ padtrymać ich «svajoj prysutnaściu» na aktualnych śpiektaklach.

Varta adznačyć, što teatr «Lalka» razam z Kupałaŭskim, Kołasaŭskim i RTBD zastajecca adnym ź niešmatlikich teatraŭ, dzie ŭsie ŭłasnyja śpiektakli robiacca pa-biełarusku.

Kamientary da artykuła