Biełaruska pakazała, jak stvaryła z «Leha» kaścioł śviatoha Alaksieja ŭ Iviancy
Biełaruska, jakaja žyvie za miažoju, vyrašyła zrabić dla siabroŭki niezvyčajny padarunak na dzień naradžeńnia — «Leha»-madel kaścioła ź jaje rodnaha horada. Ad zadumy da skrynki ź instrukcyjaj — usio było zroblena ŭručnuju, z dušoj i ŭvahaj da detalaŭ.
Kaścioł Śviatoha Alaksieja ŭ Iviancy. Fota: Wikimedia Commons
U svaim tredzie biełaruska Alaksandra raskazała, jak pryjšła da idei adnavić u farmacie «Leha» kaścioł z rodnaha miastečka svajoj siabroŭki. Pa jaje słovach, usio pačałosia z daŭniaj mary stvaryć ułasny nabor kanstruktara «Leha», ale jana doŭha nie mahła znajści varty siužet. Usio źmianiłasia ŭ lutym 2025 hoda, kali pačałasia padrychtoŭka da dnia naradžeńnia siabroŭki, jaki jana adznačaje ŭ kancy sakavika.
Siabroŭka rodam z Ivianca, i aŭtarka vyrašyła padaryć joj minijaciurnuju viersiju kaścioła śviatoha Alaksieja — architekturnaha pomnika, dobra viadomaha miascovym žycharam. Zadača była niaprostaja: sprajektavać madel z nula, ukłaścisia ŭ termin i zrabić tak, kab padarunak vyklikaŭ ciopłyja pačućci.
Fota: @abrasaurus / threads.net
Z čaho pačać: instrumienty i padrychtoŭka
Dla stvareńnia madeli «Leha» była abranaja prahrama Bricklink Studio — biaspłatny instrumient dla prajektavańnia naboraŭ «Leha». Jana dazvalaje nie tolki madelavać zbudavańni ź virtualnych kubikaŭ, ale i stvarać instrukcyi, rendary (vizualizacyi) i praviarać, ci isnujuć peŭnyja detali ŭ śviecie «Leha».
Sam Bricklink — heta hihancki markietpłejs dla fanataŭ «Leha», dzie možna publikavać svaje prajekty, kuplać detali i ŭdzielničać u konkursach. Z 2019 hoda płatforma naležyć samoj kampanii «Leha», i časam lepšyja pracy traplajuć u aficyjnuju vytvorčaść.
Kab adnavić źniešni vyhlad kaścioła, treba było sabrać jak maha bolš źviestak. Pa słovach Alaksandry, jana karystałasia Google, kartami, starymi fatahrafijami i navat kadrami z drona. Chacia niekatoryja drobnyja detali daviałosia apuścić, heta nie sapsavała prajekt.
Kančatkovy prajekt. Fota: @abrasaurus / threads.net
Prajektavańnie: ad čarciažoŭ da pieršych kubikaŭ
Alaksandra zaŭvažaje, što jana nie architektarka i nie dyzajnierka, ale mieła školny dośvied čarčeńnia i pracavała ŭ AutoCAD padčas vučoby va ŭniviersitecie. Heta dapamahło joj raźbić kaścioł na łahičnyja častki: padmurak, kałony, uvachodnuju hrupu, vokny, dach. Kab lepš zrazumieć strukturu, jana zrabiła eskizy na iPad — prostyja nakidy, što dazvolili vizualizavać budynak i ŭjavić jaho jak «cahlinki».
Spačatku treba było vybrać maštab i stupień detalizacyi. Dziaŭčyna pačała z ekśpierymientaŭ: stvarała asobnyja elemienty, padbirała adpaviednyja vokny i kałony, kab zrazumieć, jak usio budzie vyhladać u farmacie «Leha». Karysnaj akazałasia funkcyja adlustravańnia ŭ Studio: pakolki kaścioł simietryčny, možna było zrabić adnu pałovu, a potym «adlustravać» jaje i złučyć abiedźvie častki dacham i padmurkam.
Prahrama Studio nahadvaje prafiesijnyja 3D-redaktary nakštałt 3ds Max, i heta było na ruku, bo aŭtarka ŭžo mieła bazavyja navyki pracy z padobnym softam. Ale ŭźnikali i ciažkaści. Naprykład, validatar prahramy (instrumient, što praviaraje najaŭnaść detalaŭ u realnaści) pakazvaŭ, što niekatoryja elemienty, jak ružovaje akno, nielha zamović. A kryžy dla viežaŭ uvohule nie ŭvachodzili ŭ standartny nabor «Leha» — daviałosia šukać anałahi na Bricklink, vyvučajučy inšyja prajekty kaściołaŭ.
Fota: @abrasaurus / threads.net
Dadać koleru i detalaŭ
Stvarać madel «Leha» tolki ŭ šerych tanach — sumna, asabliva kali heta padarunak. Nasamreč kaścioł śviatoha Alaksieja davoli strymany, ale aŭtarka vyrašyła dadać jaskravaści ŭnutry: ružovy ałtar, fijaletavyja i žoŭtyja plitki padłohi, łavy dla prychadžan i navat dva pastamienty z katami. Čamu katy? Bo ŭ siabroŭki dva «katadziciaci», i heta staŭ asabisty štrych u prajekcie.
U Studio katy byli tolki šerymi, a patrebny byŭ adzin rudy. Na dapamohu pryjšoŭ znajomy, jaki zachaplajecca rośpisam minijaciur. Jon uručnuju pafarbavaŭ fihurku, zrabiŭšy jaje idealnym dadatkam da madeli.
Fota: @abrasaurus / threads.net
Kab dadać sabie matyvacyi, Alaksandra na peŭnym etapie pačała pakazvać prajekt siabram i znajomym, dzialiłasia pieršymi rendarami (ličbavymi vyjavami madeli). U vyniku, jak jana pryznajecca, samym ciažkim było svoječasova spynicca — chaciełasia biaskonca dadavać novyja detali.
Finał: ad prajekta da skrynki
Na apošnim etapie prajekt zahruzili ŭ Bricklink, dzie prahrama zhienieravała śpis usich patrebnych detalaŭ. Alaksandra zamoviła ich, upakavała ŭ skrynku ź instrukcyjaj, stvoranaj u Studio. Padarunak byŭ hatovy da kanca sakavika, jak i płanavałasia. Atrymałasia nie prosta madel «Leha», a simvał siabroŭstva i pamiaci pra radzimu — maleńki kaścioł śviatoha Alaksieja z katami i jaskravym interjeram.
Čytajcie taksama:
Realny dom, pabudavany biełaruskimi architektarami, moža stać kanstruktaram LEGO
U Aŭstralii ŭ narkahandlara kanfiskavali 74 darahija nabory Lego