U hrodzienskaj sinahozie źnieśli častku ścien — chočuć viarnuć histaryčny vyhlad
U vialikaj charalnaj sinahozie ŭ Hrodnie źnieśli ŭnutranuju pieraharodku pamiž viestybiulem i malelnaj załaj. Na źmieny ŭnutry papularnaha turystyčnaha abjekta źviarnuli ŭvahu hrodziency ŭ fejsbuk-hrupie «Hrodno», zaŭvažyła Hrodna.life.
U hrodzienskaj sinahozie źnieśli ŭnutranuju pieraharodku. Fota: Ina Krajniova, Facebook-hrupa «Hrodno
Arki zakłali cehłaj u dva płasty i zamazali tynkoŭkaj u savieckija hady — tak źjavilisia pustyja ŭsiaredzinie pieraharodki. Uvachodnaja hrupa sinahohi była zamuravanaja amal 70 hadoŭ.
Prybraŭšy pieraharodki, hetuju častku sinahohi viarnuli da aŭtentyčnaha źniešniaha vyhladu — mienavita takim jon byŭ u aryhinale, paśla apošniaj pierabudovy budynka ŭ 1902−1905 hady.
Unutranaja pieraharodka pamiž viestybiulem i malelnaj załaj. Fota 2019 hoda. Krynica: «Jandeks-karty»
Źniesienaja viasnoj 2025 hoda pieraharodka. Fota: Ina Krajniova, fejsbuk-hrupa «Hrodno»
U paślavajenny čas u budynku sinahohi raźmiaščalisia składy. Paźniej, z 1960-ch pa 1991 hod, tut pracavali mastackija majsterni. Uvieś hety čas budynak pastupova razburaŭsia. Vyratavać sinahohu ŭdałosia dziakujučy dachu i aciapleńniu — jany zabiaśpiečvali suchaść pamiaškańniaŭ.
U 1991 hodzie sinahohu viarnuli jaŭrejskaj abščynie. Pa ŭspaminach kiraŭnika hrodzienskaj iŭdziejskaj abščyny Barysa Kviatkoŭskaha, paśla pieradačy sinahohi budynak byŭ u žudasnym stanie.
«Šeść hruzavikoŭ adnaho tolki śmiećcia vyvieźli. Mazaičnuju padłohu vialikaj zały tak i nie znajšli. Ciažka było hladzieć na heta ŭsio, ale my spravilisia i praz hady ŭ sinahohu pryjemna zajści», — uspaminaŭ Kviatkoŭski.
Sinahoha ŭ 90-ch hadach XX stahodździa
Paśla pieradačy sinahohi pieršaja dapamoha na restaŭracyju pryjšła z Aŭstralii. Harvykankam vydzieliŭ vialikuju sumu na dakumientacyju i abśledavańnie.
Były viazień hrodzienskaha hieta Fieliks Zandman na restaŭracyju pieraličyŭ $10 tysiač. Taksama dapamahli mnohija hrodzienskija pradpryjemstvy: u 2010-ch u restaŭracyju sinahohi aktyŭna ŭklučyłasia hrupa kampanij «ZOV».
Čytajcie taksama:
Adnu z najvialikšych sinahoh Biełarusi pradajuć u Kobrynie
Zapuścili płatformu dla virtualnych padarožžaŭ pa stračanaj architektury